Qaraózek rayonı mektepke shekemgi hám mektep bilimlendiriwi bólimine qaraslı ulıwma orta bilim beriw mekteplerinde 2-sentyabr-Bilimler kúni múnásibeti menen jańa 2025-2026-oqıw jılınıń dáslepki qońırawı qaǵıldı.

Usınday bayram keshesi rayondaǵı 5-sanlı mektepte ótkerilip, ilajǵa rayon hákimi Anvar Baymuratov, bilimlendiriw tarawı basshı xızmetkerleri, nuranıylar menen mektep oqıwshıları hám ata-analar qatnastı.
Bayram keshesi Ózbekstan hám Qaraqalpaqstan Respublikalarınıń Mámleketlik gimnleri menen baslandı.
Ilajda rayon hákimi hám basqalar shıǵıp sóylep, qatnasıwshılardı Ózbekstan Respublikası Ǵárezsizliginiń 34 jıllıǵı hám jańa oqıw jılınıń baslanıwı menen qutlıqlap, birinshi klasqa qabıllanıp atırǵan balalarǵa 12 atamadaǵı Prezident sawǵaların saltanatlı jaǵdayda tapsırdı.
Bunnan soń rayon hákimi Anvar Baymuratov 1-klass oqıwshılarına ǵárezsizlikligimizdiń jemisleri haqqında túsinik berip, «Keleshek sabaǵı»n ótti.
Sonday-aq, rayon hákimi mektep pitkeriwshi jaslar menen de keńnen pikirlesti hám olarǵa óziniń ómir tájiriybeleri haqqında aytıp, keleshektegi rejeleri menen tanıstı.

Qaraqalpaqstan xabar agentligi