Nókis rayonı «Samanbay» awıl puqaralar jıyını aymaǵında xalıq hám jámiyet tárepinen basqarılatuǵın máhálle kompleksiniń jańa imaratı paydalanıwǵa tapsırıldı.

Ilajǵa rayon hákimi Z.Zaytov hám Ózbekstan máhálleleri associaciyası Qaraqalpaqstan Respublikası basqarması baslıǵı S.Turmanov qatnasıp, Prezidentimiz tárepinen elimizde máhálle institutın qáliplestiriw hám jumısların jetilistiriw boyınsha alıp barılıp atırǵan ilajlar haqqında keń túrde aytıp ótip, máhálle turǵınların Ǵárezsizligimizdiń 34 jıllıǵı bayramı hám jańa imarat ashılıwı menen qızǵın qutlıqladı.
Imarat paydalanıwǵa tapsırılǵannan soń, “Samanbay” máhálle jetiligi, xalıqqa xızmet kórsetiw ushın erler hám hayal-qızlar shashtárezxanaları, tigiwshilik, gilem cexı, IT oqıw orayı, fitnes klubı óz jumısın baslaydı.
Bul máhálle imaratı Ózbekstan Respublikası Prezidentiniń «Islam rawajlanıw banki hám OPEK xalıqaralıq rawajlanıw qorınıń qatnasıwında «Awıllıq jerlerdi turaqlı rawajlandırıw» joybarın ámelge asırıw ilajları haqqında»ǵı qararına muwapıq, 3,7 mlrd. sumlıq qarjı esabınan qurıp pitkerildi.

Qaraqalpaqstan xabar agentligi