Máhálle – xalıq penen mámleket arasındaǵı isenim kópiri sıpatında xızmet etetuǵın, insandı jámiyettiń bir bólegi bolıwǵa úyretetuǵın, onı keńpeyillik hám xalıqshıllıq ruwxında tárbiyalaytuǵın tárbiya besigi. Mine, usınday ullı qádiriyatlar orayı bolǵan máhállelerge itibar mámleketimiz basshısı tárepinen kún tártibine qoyılǵan. Shıǵısqa tán mádeniyattı ózinde jámlegen máhállelerimizdiń abırayın arttırıw, máhálle arqalı elimizdiń rawajlanıwı ushın xızmet etiw minnetimiz bolıp esaplanadı.

Prezidentimiz óziniń shıǵıp sóylegen sózlerinde “Biz jumısımızdıń birinshi kúnlerinen-aq hámme jumıstı máhállede, xalqımız benen birgelikte shólkemlestirip kiyatırmız. Bul sistemanı basqıshpa-basqısh rawajlandırdıq. Endi jáne qosımsha kúsh, imkaniyatlar berilmekte. Bul hám wákillik, hám juwapkershilik degeni. Máhálleler – mámleketimizdiń eń úlken tiykarı” dep atap ótkenleri de biykarǵa emes. Sebebi máhálleler shın mánisinde xalıqtıń dártin jeńillestiriwshi, olardıń isenimli mákanına aylanbaqta.
2023-jıl 26-sentyabrde Ózbekstan Respublikası Prezidenti Shavkat Mirziyoev tárepinen máhálle kesiminde islesiw sistemasın jáne de kúsheytiw, máhálle “jetiligi” jumısın jolǵa qoyıw boyınsha ótkerilgen májiliste bir qatar wazıypalar belgilengen edi. Bul wazıypalardıń orınlanıwın támiyinlew ushın máhálleni basqarıw sistemasın jetilistiriw hám máhálle “jetiligi” jumısın jolǵa qoyıw boyınsha Prezidentimizdiń 2023-jıl 21-dekabrdegi “Máhálle institutınıń jámiyettegi rolin túp-tiykarınan arttırıw hám onıń xalıqtıń mashqalaların sheshiwde birinshi buwın sıpatında islewin támiyinlewge qaratılǵan ilajlar haqqında” ǵı pármanına bola, máhálle abadanlıǵın támiyinlew, “Abat máhálle”, “Abat kóshe”, “Abat shańaraq” normaların engiziwde xalıqtıń belsene qatnasıwın hám juwapkershiligin arttırıw ilajların kóriw, máhállelerdegi mashqalalardıń óz waqtında hám nátiyjeli sheshiliwinde bir qatar wazıypalar qatarında máhállelerdiń materiallıq-texnikalıq támiynatın jaqsılaw, olarǵa ajıratılatuǵın qarjılardı oraylasqan túrde bólistiriw, tarawǵa zamanagóy málimleme-kommunikaciya texnologiyaların engiziw, máhálle juwapkerleriniń mamanlıǵın arttırıw, olarda zamanagóy basqarıw kónlikpeleri qáliplesiwine járdemlesiw wazıypaları belgilep berilgenligi atap ótilgen edi.
Usı wazıypalardıń orınlanıwın támiyinlew maqsetinde orınlarda máhállelerdiń materiallıq bazası bekkemlenip, xızmetkerlerge qolaylı sharayatlar jaratılmaqta.
Solardıń qatarında Ózbekstan Respublikası Ǵárezsizliginiń 34 jıllıǵı múnásibeti menen Moynaq rayonındaǵı MPJ hám APJ basshılarına máhálle byudjeti esabınan zamanagóy kompyuterler berildi.
Ilajǵa Moynaq rayonı hákimi Baxtiyor Menglibekov qatnasıp, elimizde Prezidentimiz tárepinen máhálle institutları jumısların bekkemlew, xalıqtıń abadan turmısta jasawı ushın jaratılıp atırǵan imkaniyatlardı atap ótti hám rayondaǵı MPJ hám APJ basshılarına zamanagóy kompyuterlerdi tapsırdı.
-Bul baslama máhállelerdiń materiallıq-texnikalıq bazasın bekkemlew, aymaqlarda zamanagóy basqarıw sistemasın qáliplestiriw hám xalıqqa kórsetilip atırǵan xızmetlerdiń nátiyjeliligin bunnan bılay da arttırıwǵa xızmet eteri sózsiz,-deydi Máhálleler associaciyası Moynaq rayonlıq bóliminiń baslıǵı Sultanbek Rasbergenov.

G.Turdıshova, Qaraqalpaqstan xabar agentligi