Ellikqala rayonında 2025-2026-oqıw jılınıń baslanıwı múnásibeti menen barlıq 76 ulıwma bilim beriw mákemesinde “Watan ushın, millet ushın, xalıq ushın!” súreni astında “Birinshi qońıraw” ilajları joqarı dárejede shólkemlestirildi.

Ellikqala rayonı hákimi V.Niyazimbetov rayondaǵı 22-sanlı ulıwma bilim beriw mektebinde ótkerilgen ilajda qatnasıp, oqıwshılardı hám olardıń ata-anaların jańa oqıw jılı menen qızǵın qutlıqladı. Ol óziniń shıǵıp sóylegen sózinde sońǵı jılları bilimlendiriw tarawında ámelge asırılıp atırǵan reformalar, jaslardıń zamanagóy hám tereń bilim alıwı ushın jaratılıp atırǵan sharayatlarǵa toqtap ótti, – dep maǵlıwmat beredi rayon hákimligi Málimleme xızmeti bólimi.
Birinshi klassqa qádem taslap atırǵan balalarǵa dástúriy túrde “Prezident sawǵası” tapsırıldı.
Sonday-aq, rayon basshısı “Keleshek saatı” sabaqlarına da qatnasıp, oqıwshı jaslar menen ashıqtan-ashıq sáwbetlesti, olardıń pikir-usınısların tıńladı.
Maǵlıwmat ornında, rayonda jámi 76 bilimlendiriw mákemesi jumıs alıp barmaqta. Olardan 74 i ulıwma bilim beriw mektebi, 1 qánigelestirilgen mektep hám 1 “Bárkamal áwlad” balalar mektebi bolıp esaplanadı. Bul mekteplerde bilimlendiriw 5 tilde – ózbek, qaraqalpaq, qazaq, túrkmen hám rus tillerinde alıp barıladı.
2025-2026-oqıw jılında rayondaǵı ulıwma oqıwshılar sanı 34 550 di qurap, sonnan 3 555 bala birinshi klassqa qabıl etildi.
Jańa oqıw jılınıń usınday kóterińki ruwxta baslanıwı – bilimlendiriwge bolǵan itibar, perzentlerimizdiń keleshegi ushın jaratılıp atırǵan imkaniyatlardıń jáne bir ámeliy kórinisi sıpatında xızmet etpekte.

Qaraqalpaqstan xabar agentligi