Qaraqalpaqstan Respublikası Densawlıqtı saqlaw ministrligi tárepinen ǵalaba xabar qurallarınıń wákilleri ushın Taqıyatas rayonlıq medicina birlespesine press-tur shólkemlestirildi.

Ilajda rayonlıq medicina birlespesi baslıǵı wazıypasın waqtınsha atqarıwshı Dúysen Aytımbetov ǵalaba xabar qurallarınıń wákillerin birlespede jaratılǵan imkaniyatlar menen jaqınnan tanıstırdı.
Ilajda aytap ótilgenindey, elimizde alıp barılıp atırǵan áhmiyetli reformalar dáwirinde rayonlıq medicina tarawında da bir qansha unamlı ózgerisler júz berdi.
Atap aytqanda, sońǵı 2 jıl ishinde rayonlıq medicina birlespesiniń emlew-profilaktika mákemeleriniń materiallıq-texnikalıq bazası jańalanıp, 2023-jılı rayonlıq kóp tarmaqlı oraylıq poliklinikasınıń 1 kúnde 150 adam qatnaw quwatlılıǵına iye jańa imaratı hám 2025-jıldıń birinshi shereginde shańaraqlıq poliklinikanıń paydalanıwǵa tapsırılıwı joqarıda aytıp ótken pikirimizdiń ayqın dáliyli bolıp tabıladı.
Ilajda ǵalaba xabar quralları xızmetkerleri kapital ońlaw jumısları júrgizilgen rayonlıq medicina birlespesiniń tuwıwǵa járdemlesiw bólimi, usı jıldıń birinshi shereginde paydalanıwǵa tapsırılǵan shańaraqlıq poliklinikanıń ishki múmkinshilikleri hám olarda emleniwshiler ushın jaratılǵan sharayatlar menen jaqınnan tanıstı.
-Poliklinikamızda aymaq xalqına medicinalıq jaqtan xızmet kórsetiw ushın barlıq sharayatlar jaratılǵan,-deydi poliklinika laborantı Tursınay Aytjanova.-Atap aytqanda, zamanagóy gematologiyalıq analizatorlar járdeminde qannıń 21 túrdegi elementleri anıqlanadı. Bunday zamanagóy medicinalıq úskeneler xalıqqa tez hám sapalı xızmet kórsetiwde áhmiyetli orın tutpaqta.
– Bólimimiz 2024-jıldıń mart ayında kapital ońlawdan shıǵarılıp, paydalanıwǵa tapsırıldı,-deydi tuwıwǵa járdemlesiw bóliminiń akusher-ginekolog shıpakeri Gúlshiyra Utemuratova.-Búgingi kúni bólimimizde xızmetkerler hám hayal-qızlar ushın barlıq qolaylı sharayatlar jaratılǵan hám olar zamanagóy medicinalıq buyımlar hám úskeneler menen támiyinlengen. Tarawǵa engizilip atırǵan bunday jańalanıw hám ózgerisler xalıqqa medicinalıq xızmet kórsetiw sapasınıń artıwına xızmet etpekte.
Ótkerilgen press-tur dawamında jurnalistler rayonlıq medicina birlespesiniń juwapker xızmetkerlerine bir qatar sorawlar berip, olarǵa tiyisli juwap aldı.

Adilbay Orazov,
Qaraqalpaqstan xabar agentligi sholıwshısı