Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasındaǵı 7-sanlı ulıwma bilim beriw mektebinde bolıp, jańa 2025-2026-oqıw jılı baslanıwı múnásibeti menen oqıwshılar, olardıń ata-anaları hám ustazlar menen ushırastı.

Ushırasıw dawamında Joqarǵı Keńes Baslıǵı elimizde bilimlendiriw tarawında alıp barılıp atırǵan keń kólemli reformalar, jaslar ushın jaratılıp atırǵan imkaniyatlar hám zamanagóy sharayatlarǵa ayrıqsha toqtap ótti. Ol oqıwshılardı jańa bilimlerge umtılıw, joqarı sheklerdi gózlew hám Watanǵa sadıq, bilimli áwlad bolıp jetilisiwge shaqırdı.
Ilajda ustaz hám pedagoglar menen de sóylesiw ótkerilip, olardıń márt hám bilimli jaslardı tárbiyalawdaǵı pidákerlik miynetine minnetdarshılıq bildirildi. Sonıń menen birge, elimizdegi jaslar arasında joqarı nátiyjelerge erisetuǵın áwlad jetisip shıǵıwı ushın jaratılıp atırǵan imkaniyatlar atap ótildi.
Bunnan keyin, birinshi qońıraw sesti jańlap, jańa oqıw jılına start berildi. Sonday-aq, nátiyjeli miynet etip atırǵan bir qatar ustaz-pedagoglar Joqarǵı Keńestiń kókirek belgileri menen sıylıqlandı.
Saltanatlı ilaj dawamında 1-klassqa qádem qoyǵan oqıwshılarǵa Prezident sawǵaları da tapsırıldı.

Qaraqalpaqstan xabar agentligi