Evropa Komissiyası jaqın háptelerde qorǵanıw tarawına qosımsha investiciya kirgiziw názerde tutılǵan jol kartası joybarın tayarlaydı, dedi EA prezidenti Ursula fon der Lyayen Polshaǵa saparı waqtında.

– Bar mashqalalardı anıqlap, 2030-jılǵa shekem maqsetli kórsetkish hám qadaǵalaw ornı járdeminde sheshiw jolların tallaymız,-dedi ol baspasóz ánjumanında.
Fon der Lyayenniń qosımsha etiwinshe, bul reje oktyabr ayınıń basında Daniya basshılıǵında bolıp ótetuǵın Evropa Keńesiniń rásmiy emes májilisinde dodalanadı.
Iyun ayında Gaagadaǵı NATO sammitinde awqamlaslar 2035-jılǵa barıp hár jılı tiykarǵı qorǵanıw zárúrligi ushın jalpı ishki ónimniń 5 procentin ajıratıwǵa kelisip alǵan edi. AQSh Prezidenti Donald Tramp Arqa Atlantika alyansı sammitin “úlken tabıs” dep atadı, sebebi sonda Vashington shártnamasınıń kollektivlik qorǵanıw haqqındaǵı 5-statyasına sadıqlıq jáne bir márte bir awızdan tastıyıqlanǵan.
May ayında EAǵa aǵza mámleketler arnawlı kredit quralın jaratıwǵa kelisip aldı. Sol arqalı qural islep shıǵarıwdı kóbeytiw ushın 150 milliard evro tartılıwı kútilmekte. Ulıwma, Bryussel rejesinde EA mámleketleri byudjetinen jámi 650 milliard evroǵa shamalas qarjı ajıratıw názerde tutılǵan.
Bizge belgili, usı jıl 19-mart kúni EK “Evropanı qayta qural-jaraq penen támiyinlew” jańa qorǵanıw strategiyasın usınǵan edi. Keyin ala bir qatar aǵza mámleketlerdiń narazılıǵı sebepli hújjettiń atı “basqınshılıqtan jıraq” – “Tayarlıq-2030” dep ózgertildi. Usı strategiya tiykarında tórt jıl dawamında qural-jaraqqa 800 milliard evro jumsalıwı múmkin.

S.Rahimov, ÓzA