Múnásibet

Mámleketimiz basshısınıń atap ótkenindey, 1991-jıl 31-avgust kúni elimizdiń turmısı hám táǵdirinde túpkilikli burılıs jasaǵan, shın mánisindegi ullı tariyxıy waqıya júz berdi. Neshe júz jıllar dawamında keleshekke úlken úmit hám isenim menen qarap, bárqulla sabır-taqat penen jasaǵan xalqımız ullı ármanına eristi – óziniń mámleketlik ǵárezsizligin qolǵa kirgizdi.
Ǵárezsizlik jıllarında xalqımız óziniń joqarı potencialı, bekkem erk-ıqrarı hám mártligin kórsetip, úlken rawajlanıw jolın basıp ótti. Mámleketimizde barlıq tarawlar rawajlandı. Puqaralardıń turmıs dárejesi jaqsılandı. Ózbekstan dúnya jámiyetshiliginiń teń huqıqlı aǵzası sıpatında alıs-jaqındaǵı barlıq mámleketler menen doslıq hám birge islesiw qatnasıqların keń kólemde alıp barıp atırǵan zamanagóy, ashıq hám demokratiyalıq mámleketke aylandı. Mámleketimizde ǵárezsizlik jıllarında alıp barılǵan keń kólemli reformalar nátiyjesinde milliy mámleketshiligimizdiń tiykarı bekkemlenip, mámleketimizdiń suvereniteti, shegaralarımızdıń qol qatılmaslıǵı támiyinlendi, jámiyetimizde tınıshlıq-tatıwlıq, milletleraralıq tatıwlıq hám diniy keńpeyillik ortalıǵın kúsheytiw, nızam ústinligin támiyinlew, insan huqıqları, erkinlikleri hám nızamlı máplerin qorǵaw hám ámelge asırıw boyınsha úlken jumıslar ámelge asırıldı.
Jeke menshik múlkti qollap-quwatlaw, sırt el investorları ushın qolaylı ortalıq jaratıw, eksport potencialın arttırıw sıyaqlı ilajlar óz nátiyjesin bermekte. Jaqın jıllarda kishi hám orta biznesti rawajlandırıwǵa úlken itibar qaratıldı. Atap aytqanda, agrar tarawda jer reformaları, sanaatta klaster sistemasın engiziw hám sanlı ekonomikanı qáliplestiriw arqalı mámlekettiń ekonomikalıq qúdireti artpaqta. Turizm hám logistika tarawları da jańa basqıshqa shıqpaqta.
Prezidentimizdiń baslaması menen Qaraqalpaqstan Respublikasın sociallıq-ekonomikalıq jaqtan rawajlandırıw boyınsha sońǵı jılları 20 dan aslam qarar hám pármanlardıń qabıl etiliwi bul mámleketimiz jetekshisiniń qaraqalpaq xalqına bolǵan atalarsha ǵamxorlıǵı hám itibarı desek asıra aytqan bolmaymız.
Sońǵı segiz jılda “Insan qádiri ushın” degen iygilikli ideya tiykarında barlıq tarawlarda túpkilikli jańalanıw hám ózgerisler ámelge asırılmaqta. Bul baǵdarda Qaraqalpaqstan Respublikasında da keyingi jılları barlıq tarawlarda nátiyjeli jumıslar ámelge asırılmaqta. Tek ǵana ishimlik suwı támiynatı tarawındaǵı joybarlardan Nókis qalasındaǵı suw tazalaw imaratındaǵı jumıslardı alıp qaraytuǵın bolsaq, bul suw tazalaw imaratı qalada jasaytuǵın 270 mıńnan aslam xalıqqa taza ishimlik suwın jetkerip beriwshi qurılma bolıp esaplanadı.
Mámleketimiz basshısınıń 2022-jıl 22-yanvardaǵı 98-sanlı qararına muwapıq, quwatlılıǵı házirgi waqıtta sutkasına 65 mıń kub metr bolıp, onı sutkasına 95 mıń kub metrge shekem arttırıw boyınsha qurılıs jumısları dawam etpekte. Joybar tolıq iske túskennen keyin Nókis qalasınıń derlik 270 mıń xalqı taza ishimlik suwınan paydalanadı. Nókis suw tazalaw imaratın rekonstrukciyalaw joybarı bul ápiwayı qurılıs emes, hámmesi insan qádiri, insan táǵdirine baylanıslı. Sebebi, hár bir metr taza suw – bul keleshek, hár bir tamshı bolsa – bul ómir. Áne usınday joybarlardan jáne biri Mańǵıt suw tazalaw imaratı. Házirgi waqıtta bul obektte qurılıs jumısları jedellik penen alıp barılmaqta. Hár bir shańaraqqa jetkeriletuǵın taza suw perzentlerdiń salamatlıǵına, eldiń keleshegine, insanlardıń ómiri hám millet genofondına baylanıslı.
Bunıń negizinde bolsa hámmesi insan qádiri ushın ekeni, ásirese, xalıqtı taza ishimlik suwı menen támiyinlewge qaratılǵan iygilikli joybarlardıń ámelge asıwı. Tez arada Nókiste hám Mańǵıtta suw tazalaw imaratlarınıń iske túsiriliwi rejelestirilgen. Bayram aldında alıp barılıp atırǵan bunday iygilikli jumıslardıń barlıǵı ǵárezsizligimiz benen tıǵız baylanıslı. Jańa Ózbekstandaǵı reformalar xalıqtıń abadanlıǵı, insan qádiri hám turaqlı rawajlanıw principlerine súyengen halda jáne de tereńlespekte. Qısqasha aytqanda, ǵárezsizligimizdiń otız tórt jıllıq dáwirinde basıp ótken rawajlanıw jolımızdıń juwmaǵı, janajan Watanımızda insan qádiri, abırayı-mártebesiniń qanshelli ústin qoyılǵanınan, elimizde tınıshlıq hám turaqlılıqqa erisilgeninen, mámleketimiz shegaralarınıń qol qatılmaslıǵı támiyinlengeninen jáne milletleraralıq tatıwlıq hám diniy keńpeyilliktiń bekkemlengeninen dárek beretuǵının umıtpawımız kerek.
Guljan Xalmuratova,
Oliy Majlis Nızamshılıq palatasınıń deputatı, ÓzLiDeP frakciyasınıń aǵzası.

Qaraqalpaqstan xabar agentligi