Respublikamızdıń eń arqa shıǵıs aymaǵında jaylasqan Taxtakópir rayonında sońǵı jılları xalıq xojalıǵınıń barlıq tarawlarında kóplegen iri ózgeris hám jańalanıwlar júz bermekte.

Aymaqta jańa isbilermenlik subektleri menen birge iri óndiris kárxanaları iske túsip, awıl-aymaqlarda záwlim turaq jaylar, barlıq qolaylıqlarǵa iye sociallıq obektler boy tiklemekte. Kóshe-qıyabanlar zamanagóy túrge enip, Beltaw awıl puqaralar jıyınında jaylasqan Qaratereń turizm kompleksi xalqımızdıń ház etip dem alatuǵın súyikli orınlarınıń birine aylandı, desek aljaspaǵan bolamız.
Usınday miynette mol tabıslardı qolǵa kirgizip kiyatırǵan taxtakópirshiler de Ózbekstan Respublikası Ǵárezsizliginiń 34 jıllıq bayramın «Watan ushın, millet ushın, xalıq ushın!» súreni astında kóterińki ruwxta belgilep ótti.
Zamanagóy tiptegi Dáwqara sport kompleksinde ótkerilgen bayram ilajına rayon basshıları, deputatlar, belsendi nuranıylar, jaslar hám basqa keń jámiyetshilik wákilleri qatnastı.
Onda rayon hákimi J. Adilov rayon xalqın Ǵárezsizlik bayramı menen qızǵın qutlıqlap, sońǵı jılları elimizde húrmetli Prezidentimizdiń basshılıǵında alıp barılıp atırǵan keń kólemli reformalar, sonıń ishinde, Taxtakópir rayonında ámelge asırılǵan reformalar, erisilgen jetiskenlikler hám jańalanıwlarǵa ayrıqsha toqtap ótti.
Bayram ilajı dawamında respublikamızǵa belgili kórkem óner sheberleri, rayonlıq Mádeniyat bólimi xızmetkerleri, Balalar muzıka hám kórkem óner mektebi tárbiyalanıwshıları tárepinen tayarlanǵan koncert baǵdarlaması jıynalǵanlardıń názerine usınıldı. Koncertten ana-Watan, tuwılǵan jer hám Ǵárezsizlikti jırlawshı nama-qosıqlar, oyın-zawıq hám saxnalıq kórinisler orın aldı.

Adilbay Orazov,
Qaraqalpaqstan xabar agentligi sholıwshısı.