Búgin mámleketimizde azatlıq hám erkinlik nápesi esip, elimizdiń barlıq aymaqlarında «Watan ushın, millet ushın, xalıq ushın!» súreni tiykarında Ózbekstan Respublikası Ǵárezsizliginiń 34 jıllıq bayramı keń túrde belgilenbekte.

Búgingi kúni 115 mıńnan aslam xalıq tınısh-tatıw turmıs keshirip atırǵan Shımbay rayonında da Ǵárezsizlik kúni bayramı saltanatlı túrde belgilenip ótildi.
Kórkem hám zamanagóy kórinistegi ashıq teatrda ótkerilgen bayram ilajına rayon basshıları, deputatlar, belsendi nuranıylar, jaslar hám keń jámiyetshilik wákilleri qatnastı.
Onda rayon hákimi A.Tajetdinov shıǵıp sóylep, jıynalǵanlardı bayram múnásibeti menen qızǵın qutlıqladı hám sońǵı jılları elimizde Prezidentimizdiń basshılıǵında alıp barılıp atırǵan kólemli reformalar, ásirese, Shımbay rayonın sociallıq-ekonomikalıq jaqtan rawajlandırıw baǵdarında ámelge asırılıp atırǵan jumıslarǵa keń túrde toqtap ótti.
Ásirese, Shımbay rayonı aymaǵın kompleksli rawajlandırıw, joqarı ekonomikalıq ósimge erisiw, biznes ortalıǵın jaratıw, xalıqtıń bántligin támiyinlew hám dáramatların arttırıw maqsetinde, Ózbekstan Respublikası Prezidenti tárepinen 2025-jıldıń 1-aprel kúni qabıl etilgen “Respublika aymaqların jedel kompleksli rawajlandırıw ushın tańlap alınǵan rayon (qala)larda ámeliy ilajlardı ámelge asırıw haqqında”ǵı arnawlı qararı tiykarında islenip atırǵan jumıslardı maqtanısh penen atap ótti.
Bunnan soń rayonlıq mádeniyat bólimi xızmetkerleri tárepinen tayarlanǵan saz-sáwbetli koncert baǵdarlamasına náwbet berilip, onda respublikamızǵa belgili qosıqshılar hám jas talant iyeleri tárepinen ana-Watan, tuwılǵan jer hám Ǵárezsizlikti jırlawshı qosıqlar ilaj qatnasıwshılarınıń kewillerine kóterińki keypiyat baǵıshladı.
-Ótkerilip atırǵan bul bayram xalıq xojalıǵınıń barlıq taraw wákilleri sıyaqlı, bilimlendiriw sisteması xızmetkerlerine ózgeshe zawıq baǵıshladı,-deydi Shımbay rayonlıq Mektepke shekemgi hám mektep bilimlendiriwi bóliminiń baslıǵı Mámbetsayd Jaqsımov.-Haqıyqatında da sońǵı jılları elimizdiń basqa aymaqlarında bolǵanı sıyaqlı, Shımbay rayonında da kóplegen iri ózgeris hám jańalanıwlar júz berdi. Ásirese, bilimlendiriw tarawına ayrıqsha itibar qaratılıp, mektepler hám balalar baqshaları zamanagóy túrge endi. Atap aytqanda, bıyılǵı jıldıń ózinde mámleketlik investiciya baǵdarlaması tiykarında, eki mektep hám eki balalar baqshaları jańadan qurılıp, bir baqshaǵa kapital rekonstrukciya jumısları júrgizilmekte. Pursattan paydalanıp, respublikamızdıń barlıq xalqın Ózbekstan Respublikası Ǵárezsizliginiń 34 jıllıq bayramı hám 2-sentyabr-Bilimler kúni menen shın kewilden qutlıqlayman. Ilayım aspanımız ashıq, elimiz tınısh hám abadan bolıp, Watanımız Ǵárezsizligi máńgige bolǵay!
Bayram saltanatı sońında aspanǵa salyutler atılıp, bul qatnasıwshılar kewiline ózgeshe zawıq baǵıshladı.

Adilbay Orazov,
Qaraqalpaqstan xabar agentligi sholıwshısı.