Mámleketimiz ǵárezsizlikke eriskennen sońǵı ótken dáwirde barlıq tarawlar qatarı energetika tarawında da alıp barılıp atırǵan reformalar nátiyjesinde shetki aymaqlarda jasap atırǵan xalıqtıń uzaq jıllar dawamında qıynap kelgen mashqalalar basqıshpa-basqısh óz sheshimin tappaqta.

Ózbekstan Respublikası mámleketlik ǵárezsizliginiń 34 jıllıǵı aldınan paydalanıwǵa tapsırılǵan Taqıyatas rayonlıq elektr támiynatınıń jańa imaratı da ǵárezsizligimiz hám tarawda erisilip atırǵan jetiskenliklerimizdiń nátiyjesi bolıp tabıladı.
Ózbekstan Respublikası Prezidentiniń 2020-jıl 23-noyabrdegi arnawlı qararına tiykarlanıp qurılǵan obekttiń smetalıq bahası 3,7 mlrd. sum bolıp, onıń qurılısında sońǵı túrdegi zamanagóy qurılıs materialları, atap aytqanda, energiya únemlewshi texnologiyalardan keńnen paydalanıldı.
Jańa imarattıń ashılıwına baǵıshlanǵan ilajda sózge shıqqanlar mámleketimizde elektr energetikası tarawın rawajlandırıwǵa qaratılıp atırǵan Prezidentimizdiń itibarı oǵada úlken ekenligin atap ótti. Taqıyatas RET baslıǵına «Oniks» avtomashinasınıń gilti tapsırıldı. Jańa imaratta jaratılǵan sharayatlar aymaq xalqına kórsetilip atırǵan xızmet sapasın jáne de jaqsılaw múmkinshiligin beredi.
Jańa komplekste jaratılǵan sharayatlar, bar texnikalıq hám texnologiyalıq úskenelerdiń imkaniyatı, sonday-aq, injenerlik-texnikalıq hám jumısshı-xızmetkerler, kárxana qánigelerin oqıtıw, operativ-dispetcherlik xızmeti tárepinen ámelge asırılatuǵın energiya támiynatınıń avtomatlastırılǵan basqarıw sisteması, ruwxıylıq hám aǵartıwshılıq sıyaqlı xanalar jumıs nátiyjeliligin bunnan bılay da arttırıwǵa xızmet etedi.

Qaraqalpaqstan xabar agentligi