Nókis rayonında elimiz ǵárezsizliginiń otız tórt jıllıǵına baǵıshlanǵan «Watan ushın, millet ushın, xalıq ushın!» súreni astında bayram saltanatı bolıp ótti.

Saltanatlı ilajda rayon hákimi Z.Zaytov shıǵıp sóylep, gúllán xalqımızdı eń ullı, eń muqaddes áyyyam – elimiz ǵárezsizliginiń otız tórt jıllıǵı bayramı menen qızǵın qutlıqladı.
Atap ótilgenindey, sońǵı jılları elimizde Prezidentimizdiń basshılıǵında barlıq aymaqlar qatarında Qaraqalpaqstanda da keń kólemli reformalar ámelge asırılıp, elimizdi sociallıq-ekonomikalıq jaqtan rawajlandırıwǵa ayrıqsha itibar qaratılmaqta. Sońǵı bir neshe aydıń ózinde tek ǵana Qaraqalpaqstan ushın bir qatar áhmiyetli párman hám qararlar qabıl etilip, xalqımızǵa múnásip turmıs sharayatın jaratıwǵa bekkem tiykar belgilep berildi.
Sonıń menen birge Nókis rayonında da kishi biznes hám isbilermenlik, sanaat, xızmet kórsetiw hám awıl xojalıǵı tarawlarında bir qatar investiciyalıq joybarlar ámelge asırıldı. Bunıń nátiyjesinde xalqımız ushın jańa jumıs orınları jaratılıp, bir qatar iri óndiris kárxanaları iske túsirildi.
Saltanatlı bayram ilajı koncert baǵdarlaması menen dawam etti.
Baǵdarlamadan orın alǵan kórkem óner sheberleri hám jas talant iyeleriniń atqarıwındaǵı Watan, doslıq, tınıshlıq hám tatıwlıq, jaslıq haqkındaǵı qosıqlar hám ayaq oyınlar jıynalǵanlarǵa kóterińki keypiyat baǵıshladı.

Qaraqalpaqstan xabar agentligi