«Watan ushın, millet ushın, xalıq ushın!»

Qaraqalpaqstan Respublikası tariyxı hám mádeniyatı mámleketlik muzeyinde Ózbekstan Milliy málimleme agentliginiń Qaraqalpaqstan Respublikası boyınsha fotoxabarshısı, Ózbekstan kórkem-óner dóretiwshiler awqamı aǵzası, belgili fotoxudojnik Maqset Habibullaevtıń Ózbekstan Respublikası Ǵárezsizliginiń 34 jıllıǵına baǵıshlanǵan «Watan jalǵız, ol muqaddes!» atamasındaǵı foto kórgizbesiniń ashılıw máresimi bolıp ótti.

Onda avtordıń ǵárezsizlik jıllarında Qaraqalpaqstan Respublikasında bolǵan jańalanıwlar, qala hám awıllarımızdıń jańalanıwı, jámiyetimizde hám xalıq xojalıǵınıń bir qatar tarawlarında ámelge asırılǵan ekonomikalıq reformalar hám jetiskenliklerdi sáwlelendiriwshi fotokorrespendenciyanıń fotoreportaj, fotoxabar, fotoocherk, fotoetyud sıyaqlı bir qatar janrlarında alınǵan jámi 40 tan aslam miyneti orın alǵan.
Bul kórgizbeni shólkemlestiriwdegi tiykarǵı maqset Prezidentimizdiń usı jıl 10-iyuldegi “Ózbekstan Respublikası mámleketlik ǵárezsizliginiń otız tórt jıllıq bayramına tayarlıq kóriw hám onı ótkeriw haqqında”ǵı qararınıń orınlanıwın támiyinlew, sáne múnásibeti menen mádeniy bayram keshelerin ótkeriw, ásirese keń jámiyetshilikti, sonıń ishinde jaslardı pidayı dóretiwshi insanlardıń Watanǵa muxabbat sezimlerin jırlawshı shıǵarmaları menen jaqınnan tanıstırıwdan ibarat.
Ilajdı Ózbekstan xudojnikler dóretiwshilik awqamı Qaraqalpaqstan bólimi baslıǵı Nawrız Aytmuratov ashıp berdi. Ilajda fotoxabarshınıń bir qatar kásiplesleri, tuwısqanları, shákirtleri hám taǵıda basqalar shıǵıp sóylep, dóretiwshiniń jurnalistika hám kórkem óner tarawlarındaǵı xızmetlerine keń túrde toqtalıp ótti.
Atap aytqanda M. Habibullaevtıń fotoxabarshı sıpatında Qaraqalpaqstan Respublikası turmısınan tayarlanǵan fotomaterialları Ózbekstan Milliy málimleme agentliginiń «www.uza.uz» saytında, «Yangi Wzbekiston», «Xalq swzi», «Ishonch», «Kishloq hayoti», sonday-aq jergilikli «Erkin Qaraqalpaqstan», «Vesti Karakalpakistana», «Qoraqalpoǵiston tongi», «Qaraqalpaqstan jasları» sıyaqlı respublikalık basılımlarda turaqlı járiyalanıp kelindi.
Sonday-aq onıń fotoxudojnik sıpatında bir qansha dóretiwshilik jumısları Ózbekstan Kórkem óner akademiyası Qaraqalpaqstan bólimi tárepinen shólkemlestirilgen kórgizbelerde qoyılǵan. Máselen, 2020-jılı “Moynaq keshe hám búgin,” “Altın gúz,” “Gúmis qıs” sıyaqlı onlayn fotokórgizbeleri hám 2023-jıl 15-oktyabrde “Xalıqaralıq awıl hayalları” kúnine baǵıshlanǵan “Qádiri bálent, awıl hayalı” atamasındaǵı jeke fotokórgizbelerdiń avtorı. Bunnan tısqarı fotoxudojniktiń Ózbekstan Kórkem óner akademiyasına qaraslı Tashkent Fotosúwretler úyinde 2024-jıl avgust ayında ótkerilgen “Moynaq: keshe, búgin, erteń” hám 8-dekabr Ózbekstan Respublikası Mámleketlik Konstituciyasınıń 32 jıllıǵına baǵıshlanǵan fotokórgizbede bir qansha súwretleri orın alǵan.
Avtordıń 2025 -jıl 5-mart kuni shólkemlestirilgen 8-mart “Xalıqaralıq hayal-qızlar kúni”ne baǵıshlanǵan “Ómirdiń gúltajı, muqaddes hayal!” atamasındaǵı foto kórgizbeside keń jámiyetshilikke usınıldı.
Onıń dóretiwshilik miynetleri Húkimetimiz tárepinen múnásip bahalanıp, “Watan pidayısı” hám “Xalıqlar doslıǵı” kókirek belgileri menen sıylıqlandı. Sonday-aq ol “Altın qálem” XVII Milliy sıylıǵı ushın ótkerilgen xalıqaralıq tańlawdıń “Eń jaqsı fotoreportaj” nominaciyasınıń jeńimpazı.
-Respublikamızdıń baspasóz tarawında kóplegen foto jurnalistler xızmet etti. Olardıń hár biriniń ózine tán stili, dóretiwshilik jolı bar. Solardıń qatarında Maqset Habibullaev ta ózine tán dóretiwshilik jolına iye. Onıń rakursında respublikamızdıń barlıq tarawlarında bolıp atırǵan jańalanıwlar, dáwir qaharmanları, taraw pidayıları orın almaqta. Búgingi kórgizbede onıń elimiz ǵárezsizliginde tarawlarda erisilip atırǵan tabısları orın alǵan. Bul dóretiwshilik miynetler hár bir insanda Watanǵa degen súyispenshikti jáne de arttırarı sózsiz,-deydi Qaraqalpaqstanǵa miyneti sińgen jurnalist Shúkirbay Siypatdinov.
Fotokórgizbeden orın alǵan súwretler kórgizbe qatnasıwshılarında jaqsı tásirler qaldırmaqta. Solardıń qatarında sırt elden kelgen miymanlardıń birin sáwbetke tarttıq.
-Ózbekstan Respublikası ǵárezsizligi bayramı qarsańında elińizde turistlik saparda bolıp turmız. Bayram aldınan bul úlkede úlken dóretiwshilik ózgerisler bolmaqta. Ásirese, muzeyde bolıp, qaraqalpaq xalqınıń tariyxı, mádeniyatı menen tanısıw payıtında ájayıp bir fotokórgizbeniń gúwası bolıp atırman. Fotoxudojniktiń óz eli, watanına degen súyispenshilik sezimleri fotokórgizbede keń orın alǵan. Bular arqalı elińizdegi abadan turmıstı, xalıqtıń baxıtlı kúnlerin ańǵarıwǵa boladı,-deydi germaniyalı turist Silei Ali.
Keshe sońında Nókis qalalıq 2-sanlı mádeniyat úyiniń talantlı sazendeleri tárepinen atqarılǵan yoshlı qosıq ham milliy namalar kótereńki zawıq baǵıshladı.
Bayram múnásibeti menen shólkemlestirilgen fotokórgizbe hár bir qatnasıwshıda Watanǵa degen súyispenshilikti arttırarı sózsiz.

G.Turdıshova, Qaraqalpaqstan xabar agentligi