Ózbekstan Respublikası Prezidentiniń baslaması menen xalıqtıń turmıs abadanlıǵın arttırıw, mashqalalardı óz waqtında saplastırıw, jańa isbilermenlik subektlerin shólkemlestiriw arqalı jańa jumıs orınların jaratıw maqsetinde, Bozataw rayonına Ferǵana wálayatı biriktirilip, bul baǵdarda rayon aymaǵında birgelikte kóplegen jumıslar ámelge asırıldı.
Watanımızdıń eń ullı hám eń áziz bayramı aldınan da bunday iygilikli isler dawam etip Ferǵana wálayatı hám Bozataw rayonı hákimligi menen birgelikte jámi 12 balanıń súnnet toyları ótkerildi.

Ilajǵa Ózbekstan Respublikası Prezident Administraciyası wákili A.Januzakov, rayon hákimi B.Ubbiniyazov, rayon prokurorı N.Saparov, rayonlıq Ishki isler bólimi baslıǵı U.Kurbanbaeva, «Ferǵana-Bozataw» isbilermenlerdi qollap-quwatlaw direkciyası direktorı A.Saidov hám keń jámiyetshilik wákilleri qatnastı.
Ilajda rayon hákimi B.Ubbiniyazov hám basqalar shıǵıp sóylep keleshegimiz iyeleri bolǵan balalardı hám olardıń ata-anaların búgingi quwanıshlı kún hám Ózbekstan Respublikası Ǵárezsizliginiń 34 jıllıq bayramı menen qızǵın qutlıqladı.
Bunnan soń balalarǵa bayram sawǵaları tapsırılıp, olar kishkenelerdi sheksiz quwanıshqa bóledi.
Bayram ilajı dawamında elimizge belgili mádeniyat tarawı wákilleri ózleriniń eń ájayıp qosıqların xalqımız názerine usındı.

Adilbay Orazov,
Qaraqalpaqstan xabar agentligi sholıwshısı.