Ózbekstan Respublikası Ministrler Kabinetiniń 2023-jıl 2-fevraldaǵı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın jáne de jaqsılaw ilajları haqqında»ǵı 52-sanlı qararı tiykarında, Bozataw rayonında járdemge mútáj shańaraqlarǵa tiyisli turaq jaylardıń tóbesin shiferlap beriw, jaramsızların qaytadan qurıw boyınsha bir qatar wazıypalar belgilengen edi.

Bul jumıslardı ámelge asırıw boyınsha Ferǵana wálayatı hákimligi tárepinen awır sharayatta jasawshı 10 shańaraqtıń kóp jıllıq mashqalalarına unamlı sheshim tabılıp, olarǵa jańadan turaq jaylar qurıp berildi.
Ózbekstan Respublikası Ǵárezsizliginiń 34 jıllıq bayramı aldında, usı turaq jaylardı óz iyelerine tapsırıw máresimi bolıp ótti.
Ilajǵa rayon hákimi B.Ubbiniyazov, rayon prokurorı N.Saparov, rayonlıq Ishki isler bólimi baslıǵı U.Kurbanbaeva, «Ferǵana-Bozataw» isbilermenlerdi qollap-quwatlaw direkciyası direktorı A.Saidov hám keń jámiyetshilik wákilleri qatnastı.
Ilajda rayon hákimi B.Ubbiniyazov ilaj qatnasıwshıların Ózbekstan Respublikası Ǵárezsizliginiń 34 jıllıq bayramı menen qızǵın qutlıqlap, turaq jay iyelerine úylerdiń giltleri saltanatlı túrde tapsırıldı.
Óz gezeginde jańa turaq jay iyeleri de ózlerine kórsetip atırǵan ǵamqorlıǵı ushın mámleketimiz Prezidentine, respublikamız basshılarına, Ferǵana wálayatı hákimligine tereń minnetdarshılıq bildirip, aldaǵı waqıtları ózlerine bildirilgen isenimdi tolıq aqlap, elimizdiń rawajlanıwına ózleriniń úleslerin qosatuǵınlıǵın aytıp ótti.
Sońınan ilaj qatnasıwshıları jańa turaq jaylarda jaratılǵan qolaylıqlardı kózden ótkerip, olarǵa unamlı bahalar berdi.

Adilbay Orazov,
Qaraqalpaqstan xabar agentligi sholıwshısı