Ózbekstan ǵárezsizliginiń 34 jıllıǵı aldında jańa imaratlar qurılıp, paydalanıwǵa tapsırıw jumısları keń kólemde ámelge asırılmaqta. Sonıń ishinde, Tórtkúl rayonında xalıqqa xızmet kórsetiw baǵdarında áhmiyetli bolǵan bir qatar obektler iske qosıldı.

Rayonnıń “Tazabaǵjap” awıl puqaralar jıyını aymaǵında jeke isbilermen D.Saburov tárepinen qurılǵan 1000 orınlıq “Xan saray” toyxanasınıń saltanatlı ashılıw máresimi bolıp ótti. Ilajda rayon hákimi I.Xudaybergenov qatnasıp, jańa imarattıń ashılıwı múnásibeti menen bársheni qutlıqladı.
Jańa toyxana jumıs baslawı arqalı jergilikli xalıq ushın qosımsha jumıs orınları jaratıldı. Hayal-qızlar hám jaslar dápterine kirgizilgen 15 puqara turaqlı jumıs penen támiyinlendi, bul bolsa olardıń shańaraǵına turaqlı dáramat dáregi boladı. Sonday-aq, ilaj dawamında 10 balanıń súnnet toyı da shólkemlestirildi, – dep maǵlıwmat beredi rayon hákimligi Málimleme xızmeti bólimi.
Jańa imarattıń paydalanıwǵa tapsırılıwı qala qurılısı tarawındaǵı jetiskenliklerden biri bolıp, xalıqtıń turmıs dárejesin arttırıwǵa, isbilermenlikti rawajlandırıwǵa hám jaslardı jumıs penen támiyinlewge xızmet etedi.
Ǵárezsizlik bayramı aldınan ámelge asırılıp atırǵan bunday joybarlar mámleketimizde insan máplerine qaratılǵan reformalar izbe-iz dawam etip atırǵanın ayqın kórsetpekte.

Qaraqalpaqstan xabar agentligi