Nókis qalasında Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası Joqarǵı Keńesiniń komitet baslıǵı M.Atamuratovtıń basshılıǵında 2025-2026-oqıw jılına tayarlıqtıń barısına baǵıshlanǵan májilis bolıp ótti.

Ilajǵa Qaraqalpaqstan Respublikası Mektepke shekemgi hám mektep bilimlendiriwi ministrligi basshıları, qalalıq hám rayonlıq mektepke shekemgi hám mektep bilimlendiriwi bólimleriniń baslıqları, ulıwma orta bilim beriw mektepleriniń direktorları hám juwapker basshı xızmetkerler qatnastı.
Májiliste jańa oqıw jılına nátiyjeli tayarlıq kóriw, bilimlendiriw mákemelerinde bar sharayatlardı jetilistiriw, oqıw-tárbiya procesin joqarı dárejede shólkemlestiriw sıyaqlı máseleler hár tárepleme dodalandı. Sonıń menen birge, bilimlendiriwdiń sapasın arttırıw, muǵallimlerdiń mamanlıǵın turaqlı arttırıp barıw, tarawǵa zamanagóy bilimlendiriw texnologiyaların engiziw hám oqıwshılar ushın múnásip bilimlendiriw ortalıǵın jaratıw boyınsha wazıypalar belgilep alındı.
Ilajda bıyılǵı mektep pitkeriwshileriniń joqarı oqıw orınlarına kiriw kórsetkishleri de keń túrde tallandı. Ayırım rayonlar kesiminde nátiyjeler óz-ara salıstırılıp, joqarı kórsetkishlerge erisken aymaqlardıń tájiriybesi úlgi sıpatında kórsetip ótildi. Sonday-aq, tómen kórsetkish kórsetken aymaqlardıń jumısları da ashıq dodalanıp, olardı saplastırıw boyınsha ámeliy ilajlar belgilendi.
Sonıń menen birge, infrastruktura, oqıw quralları menen támiyinlew, pedagog kadrlardıń jetispewshiligi hám basqa da áhmiyetli máseleler de sın kózqarastan tallanıp, mashqalalardı sheshiw boyınsha anıq wazıypalar hám múddetler belgilendi.
Ilaj sońında juwapker basshılarǵa jańa oqıw jılın múnásip kútip alıw, bilimlendiriw sistemasında sapa kórsetkishlerin jaqsılaw hám belgilengen wazıypalardı óz waqtında orınlaw boyınsha kórsetpeler berildi.

Adilbay Orazov,
Qaraqalpaqstan xabar agentligi sholıwshısı