Qaraqalpaqstan Respublikası Densawlıqtı saqlaw ministrligi tárepinen ǵalaba xabar qurallarınıń wákilleri ushın press-tur shólkemlestirilip, dáslep jurnalistler Balalar kóp tarmaqlı medicina orayına alıp barılıp, ol jerde baspasóz konferenciyası ótkerildi.

Konferenciyada usı medicina orayınıń bas shıpakeri Álima Matkarimova oray tárepinen 2024-jılı hám 2025-jıldıń 6 ayı dawamında ámelge asırılǵan jumıslar hám aldaǵı rejeleri haqkında keń túrde maǵlıwmat berdi.
Atap ótilgenindey, oray tárepinen densawlıqtı saqlaw sistemasın reformalaw, emlew profilaktikalıq mákemeleriniń materiallıq-texnikalıq bazasın bekkemlew hám densawlıqtı rawajlandırıwdıń mámleketlik baǵdarlamasın orınlaw dawam ettirilmekte.
Búgingi kúnde Respublika balalar kóp tarmaqlı medicina orayında 7 bólim jumıs islep turıptı, 235 orınǵa iye. Oraydıń jumıslarınıń kólemi keńeyip, jańadan laboratoriyalıq tekseriw, joqarı texnologiyalıq emlew hám diagnostikalıq usıllar ámeliyatqa engizildi.
Orayda náresteler xirurgiyası profili boyınsha tuwma nuqsanlar menen jańa tuwılǵan nárestelerge operaciyalar islew jolǵa qoyılıp, balalarǵa joqarı texnologiyalıq operaciyalar islenip olardıń ómirin saqlap qalıwda úlken áhmiyetke iye bolmaqta.
Oraydıń laboratoriya bólimi jańadan IXLA apparatı hám avtomat bioximiyalıq úskeneler, operaciyalıq mikroskop, LOR tarawında endoskop apparatı menen támiyinlenip, bet-jaq xirurgiyası rawajlanıp, urologiyalıq, rekonstruktivlik, plastikalıq xirurgiyalıq operaciyalar jolǵa qoyıldı. Reanimaciya bólimlerinde jańa tuwılǵan nárestelerge reanimaciyalıq hám anesteziologiyalıq xızmet kórsetiw de jolǵa qoyıldı. Respublika qánigelestirilgen Pediatriya ilimiy-ámeliy medicina orayı, Respublika Balalar milliy medicina orayınıń jetekshi qánigeleri menen birgelikte operaciyalar islew jolǵa qoyıldı. Oray shıpakerleri hám miyirbiykeleri qánigeligin turaqlı túrde Tashkent qalasında hám sırt ellerdiń rawajlanǵan medicina klinikalarında arttırıp kelmekte.
Oraydıń rawajlanıwı onıń materiallıq-texnikalıq bazasınıń bekkemleniwi hám barlıq bólimlerdiń zamanagóy medicinalıq ásbap-úskeneler menen támiyinleniwi, joqarı mamanlıqtaǵı ilimiy kadrlardı – pediatr, balalar xirurgi, klinikalıq ordinatorlar hám shıpakerlerin tayarlaw menen birgelikte ámelge asırılmaqta. Oray qánigeleri xalıqaralıq ilimiy konferenciyalarda bayanatlar menen belsene qatnasıp, sońǵı jıllarda Rossiya, Germaniya, Belarus, Túrkiya, Kuveyt, Indiya, Koreya Respublikası, Qıtay hám basqa da mámleketlerdiń jetekshi qánigeleri menen tıǵız baylanısta jumıs alıp barmaqta. Telemedicinanıń rawajlanıwı da medicinanıń jańadan qolǵa kirgizgen jetiskenlikleriniń biri bolıp esaplanadı. Konferenciyada qatnasıwshılar ózlerin qızıqtırǵan sorawlarǵa juwap aldı.
Bunnan soń press-tur qatnasıwshıları Respublika qánigelestirilgen ana hám bala salamatlıǵı ilimiy-ámeliy medicina orayı mámleketlik mákemesiniń Qaraqalpaqstan Respublikası filialınıń jumısları menen tanıstı.
Filial 230 koykadan ibarat bolıp, sonnan tólemli koykadan ginekologiya bóliminde 20, tuwıw bólimlerinde 16, patologiya bóliminde 14 koyka orın ajıratılǵan.
– Filialımızda 4 tuwıw, 4 náresteler, skrining, reproduktivlik salamatlıq, másláhát poliklinikası, operativ ginekologiya, konservativ ginekologiya, laboratoriya, reanimaciya, náresteler patologiyası, náresteler reanimaciyası, operaciya islew, kir juwıw, avtoklav, asxana bólimleri xalıqqa xızmet etip kelmekte,-deydi filial direktorınıń akusherlik hám ginekologiya isleri boyınsha orınbasarı U.Xalliev.
Usı kúnge shekem, yaǵnıy 2025-jıldıń 7 ayı dawamında 186 ginekologiyalıq operaciyalar islendi. Házirgi kúnde xalıqqa sapalı xızmet etiw ushın Laboratoriya bólimi PCR apparatları menen támiynlendi. Másláhát poliklinikası bólimine kolposkopiya apparatları alıp kelindi. Shıpakerler tárepinen joqarı texnologiyalıq apparaturalar, yaǵnıy, laproskop hám gisteroskop apparatları járdeminde operaciyalar islenbekte.
Press-tur dawamında qatnasıwshılar filialda shıpakerlerdiń jumıs islewi hám puqaralar ushın jaratılǵan sharayatlar menen tanısıp, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi.