Ayrıqsha itibar hám qollap-quwatlawdı talap etetuǵın baǵdarlardan biri – bul jergilikli óndiristi rawajlandırıw, kárxanalardıń nátiyjeli jumısın támiyinlew hám olar arqalı xalıqtıń bántligin arttırıw bolıp esaplanadı.

Ámiwdárya rayonı hákimi S.Xwjametov rayondaǵı óndirislik potencialdı arttırıw, atap aytqanda jergilikli kárxanalardı qollap-quwatlaw hám olardıń nátiyjeli jumısın támiyinlew maqsetinde “Ámiwdárya qurılıs materialları” JShJ óndiris maydanında boldı, – dep maǵlıwmat beredi rayon hákimligi Málimleme xızmeti bólimi.
Sapar dawamında rayon basshısı kárxanadaǵı tas hám sheben islep shıǵarıw processleri menen jaqınnan tanıstı. Bul kárxana tek ǵana rayon emes, al pútkil respublika kólemindegi qurılıs tarawı ushın áhmiyetli shiyki zat dáregi bolıp esaplanadı. Házirgi waqıtta kárxananıń qurılıs materialların islep shıǵarıw boyınsha imkaniyatları, óndiris dárejesi hám ónimge bolǵan talabı haqqında maǵlıwmat berildi. Hákim óndiris procesindegi texnikalıq imkaniyatlardı tallap, nátiyjelilikti arttırıw, zamanagóy texnologiyalardı engiziw hám jumısshı-xızmetkerler ushın qolaylı miynet ortalıǵın qáliplestiriw áhmiyetli ekenligine ayrıqsha itibar qarattı.
Sonday-aq, sapar sheńberinde jumıs procesinde ushırasıp atırǵan ayırım mashqalalar tıńlandı hám olardı saplastırıw boyınsha tiyisli juwapkerlerge tapsırmalar berildi.
Aymaqtaǵı ekonomikalıq jedellikti arttırıw hám jergilikli islep shıǵarıwshılardı qollap-quwatlaw maqsetinde bunday ushırasıwlar turaqlı túrde shólkemlestiriliwi óndirislik potencialdı jáne de arttırıwǵa xızmet etedi.

Qaraqalpaqstan xabar agentligi