Jaslardı sanlı texnologiyalar tarawına tartıw, shetki aymaqlarda IT -tarawın rawajlandırıw hám olarǵa zamanagóy bilimlerdi iyelewi ushın sharayat jaratıw búgingi kúnde mámleketlik siyasattıń tiykarǵı baǵdarlarınan biri bolıp esaplanadı. Bul baǵdarda mámlekettiń barlıq aymaqlarında teńdey imkaniyatlar jaratıwǵa itibar qaratılmaqta.

Usı jıldıń 13-may kúni Ózbekstan Respublikası Prezidentiniń basshılıǵında ótkerilgen videoselektor májilisinde bir qatar shetki aymaqlarda IT-qalashalardı shólkemlestiriw wazıypası belgilengen edi. Usı tapsırmanıń orınlanıwı sheńberinde Shımbay rayonındaǵı “Keńes” awıl puqaralar jıyını aymaǵında jańa IT-qalasha qurılıp, paydalanıwǵa tapsırıldı.
Jolǵa qoyılǵan bul joybar jaslar ushın tek ǵana bilim alıw ornı emes, al olardıń texnologiyalıq potencialın rawajlandırıw, jumıs penen támiyinlew hám sanlı dúnyaǵa múnásip tayarlaw imkaniyatın beredi. Prezidentimizdiń atap ótkenindey, IT-qalashalar joqarı maman qánigelerdiń qatnasıwında jumıs alıp barıwı, bilimlendiriw hám ámeliy kónlikpelerdi úylestiriwi zárúr.
Shımbay rayonında iske qosılǵan bul qalasha da áne, usı maqsetlerdi qamtıp alǵan halda, respublikanıń arqa aymaqlarında jasaytuǵın jaslar ushın zamanagóy IT-qalasha shólkemlestirildi.
Bul baslama tek ǵana IT tarawın rawajlandırıwǵa xızmet etip qoymastan, al jaslardıń zamanagóy bilim hám kásiplerge qızıǵıwshılıǵın arttırıp, olardı keleshekte básekige shıdamlı kadrlar etip qáliplestiriwde áhmiyetli faktorǵa aylanatuǵınına isenemiz.

Qaraqalpaqstan xabar agentligi