Mámleketimizde hayal-qızlardı hár tárepleme qollap-quwatlaw, olardıń ekonomikalıq belsendiligin arttırıw hám jámiyettegi ornın bekkemlewge ayrıqsha itibar qaratılmaqta. Ásirese, isbilermenlik baǵdarında bilim hám kónlikpelerdi qáliplestiriw, hayal-qızlardıń erkin jumıs baslawı ushın qolaylı sharayatlar jaratıw ámeldegi reformalardıń tiykarǵı baǵdarlarınan birine aylanǵan.

Usı maqsette, Ózbekstan Respublikası Prezidentiniń baslamaları hám olar tiykarında qabıl etilgen qararlardıń orınlanıwı sheńberinde Beruniy rayonında hayal-qızlar ushın arnawlı oqıw kursları shólkemlestirildi. Bul ilajdı Ózbekstan Respublikası Ministrler Kabineti janındaǵı Biznes hám isbilermenlik joqarı mektebi ámelge asırdı.
Oqıw seminarında “Hayal-qızlar dápteri”ne kirgizilgen hám isbilermenlik penen shuǵıllanıw tileginde bolǵan 200 hayal-qız qamtıp alındı. Olar ushın arnawlı baǵdarlama tiykarında sabaqlar shólkemlestirildi hám nátiyjede qatnasıwshılarǵa belgilengen tártipte sertifikatlar tapsırıldı, – dep maǵlıwmat berdi rayon hákimligi Málimleme xızmeti bólimi.
Bul oqıw processleri hayal-qızlardıń óz biznesin jolǵa qoyıwı ushın jańa imkaniyat hám esik ashatuǵının atap ótiw kerek. Endi olar óz bilimleri hám baslamaları tiykarında ekonomikalıq jumıstı baslaw, shańaraǵı hám jámiyettiń abadanlıǵına úles qosıw imkaniyatına iye boladı.
Bunday ámeliy joybarlar xalıq arasında isbilermenlik ruwxın qáliplestiriw, ásirese, hayal-qızlar arasında ekonomikalıq erkinlikti xoshametlewde áhmiyetli orın iyeleydi.

Qaraqalpaqstan xabar agentligi