Qaraózek rayonında Saudiya Arabstanınıń “ACWA Power ” kompaniyası tárepinen qurılıp atırǵan, quwatlılıǵı 100 MVt bolǵan samal elektr stanciyasında qurılıs jumısları alıp barılmaqta. 108 million AQSh dolları muǵdarındaǵı bul joybar mámleketimizdiń turaqlı energetika strategiyasınıń bir bólegi bolıp, regionda “jasıl” energetikanı rawajlandırıwǵa qaratılǵan. Ózbekstan Respublikası Oliy Majlisi Nızamshılıq palatasınıń deputatı Baxıtbay Aldamuratov usı qurılıs maydanında bolıp, ol jerdegi jumıs procesi menen tanıstı.

Sapar sheńberinde deputat joybardı ámelge asırıwdıń házirgi basqıshı menen tanıstı, texnik qánigeler menen sáwbetlesti hám joybardıń aymaqtıń rawajlanıwına social-ekonomikalıq tásiri máseleleri dodalandı.

Házirgi waqıtta joybardıń 65-70 procenti orınlanǵan bolıp, qurılıs jumısları usı jıldıń oktyabr ayında tolıq juwmaqlanıwı rejelestirilgen. Stanciya bolsa noyabr ayında jumıs baslaydı. Joybar sheńberinde jámi 16 samal turbinasın ornatıw rejelestirilgen bolıp, búgingi kúnde olardıń barlıǵı tabıslı túrde qurıp pitkerildi.

-Bul samal elektr stanciyası tek ǵana zamanagóy energetika obekti emes, ol energetikalıq erkinlik, jańa jumıs orınların jaratıw hám aymaqtaǵı ekologiyalıq jaǵdaydı jaqsılaw jolındaǵı alǵa qoyılǵan qádem bolıp esaplanadı, – deydi deputat Baxıtbay Aldamuratov. – Joybardıń jetekshi xalıqaralıq investorlar menen tıǵız birge islesiwde ámelge asırılıp atırǵanı Ózbekstanǵa isenimli sherik sıpatında isenim artıp atırǵanınan derek beredi.

Joybar usı maqsette arnawlı shólkemlestirilgen “ACWA Power Wind Karatau FE LLC” kompaniyası tárepinen ámelge asırılmaqta. Qol qoyılǵan kelisimge muwapıq, kompaniya “Ózbekstan milliy elektr tarmaqları” AJ menen dúzilgen shártnama tiykarında 25 jıl dawamında elektr energiyasın jetkerip beredi. Sonday-aq, Qarjı ministrliginiń wákilliginde investorlar hám Ózbekstan húkimeti arasında Mámleketlik qollap-quwatlaw shártnaması (GSA) dúzilgen.

Qaraózektegi stanciya “ACWA Power” kompaniyasınıń Ózbekstandaǵı tórtinshi joybarı bolıp esaplanadı. Bunnan aldın kompaniya Ózbekstan menen uzaq múddetli sheriklikke sadıqlıǵın tastıyıqlap, Sırdárya wálayatında puw-gaz qurılmaları ornatılǵan eki ıssılıq elektr stanciyası qurılısın baslaǵan edi.

-Házirgi basqıshta samal generatorların ornatıw jumısları tolıq juwmaqlandı. Yaǵnıy, 16 samal turbinası tolıq ornatıldı. Keyingi basqısh – elektr úskenelerin sınaqtan ótkeriw (test rejiminde iske qosıw), elektr tarmaqlarına jalǵaw, basqarıw hám qadaǵalaw sistemaların tolıq sazlaw jumısları ámelge asırılmaqta. Bul basqıshlar tabıslı juwmaqlanǵannan soń, stanciya noyabr ayında tolıq iske qosılıwı rejelestirilgen,– deydi joybar basshısı Sardorbek Maxmudov jumıs baǵdarı haqqında.

Sonday-aq, sapar dawamında ekologiya hám xalıq penen birge islesiw máselelerine ayrıqsha itibar qaratıldı. “ACWA Power” wákiliniń sózlerine qaraǵanda, kompaniya aymaqta sociallıq baslamalardı, sonıń ishinde, jergilikli qánigelerdi oqıtıw baǵdarlamaları hám infrastruktura joybarların qollap-quwatlawdı ámelge asırmaqta.

Oliy Majlis deputatınıń bul saparı qayta tiklenetuǵın energetika tarawındaǵı joybarlar mámleketlik strukturalardıń ayrıqsha itibarında ekeniniń jáne bir dálili boldı. Samal energetikasın rawajlandırıw Ózbekstannıń alternativ energiya dárekleriniń úlesin arttırıw strategiyasınıń tiykarǵı elementi bolıp, onı tabıslı ámelge asırıwda xalıqaralıq kompaniyalar menen birge islesiw úlken áhmiyetke iye.

Qaraqalpaqstan xabar agentligi