Bajıxana operaciyalarınıń avtomatlastırılıwı – korrupciyadan awlaq sistema jaratıwǵa xızmet etpekte.

Bajıxana uyımlarında hár piyshembi – huqıqbuzarlıqlarǵa qarsı profilaktikalıq ilajlar kúni múnásibeti menen, “Dawıt-ata” shegara bajıxana postı xızmetkerleri tárepinen post arqalı háreketlenip atırǵan júk avtotransport quralları aydawshılarına bajıxana nızamshılıǵındaǵı ózgerisler boyınsha úgit-násiyat jumısları alıp barıldı.
Ilajda Ózbekstan Respublikası Prezidentiniń 2025-jıl 25-marttaǵı PP-57-sanlı pármanına tiykarlanıp 2025-jıl 1-sentyabrden baslap ótkeriw punktlerinde óndiriletuǵın barlıq túrdegi jıyımlar hám tólemler bajıxana uyımlarınıń málimleme sisteması arqalı óndiriletuǵını hám esabı júrgiziletuǵını boyınsha túsinikler berildi. Bunday nızamshılıqtaǵı ózgerisler, bajıxana uyımlarınıń jumısın avtomatlastırılǵan sistema arqalı ámelge asırıwǵa qaratılǵan bolıp, óz-ózinen korrupciya, paraxorlıq illetleriniń kelip shıǵıwınıń aldın alıwǵa xızmet etedi.
Sonday-aq, puqaralarǵa bajıxana shegaraların kesip ótiwde bajıxana nızamshılıǵına qatań ámel etiw hám hesh qashan bajıxana xızmetkerine “para” usınıs etpew, bajıxana xızmetkeriniń materiallıq mápdar bolıw jaǵdayına dus kelse, Ózbekstan Respublikası Bajıxana komitetiniń 11-08 qısqa hám Qaraqalpaqstan Respublikası bajıxana basqarmasınıń (61) 224-90-86 isenim telefon nomerlerine qońıraw etiwi soraldı.

Á.Jiyemuratov,
Qaraqalpaqstan xabar agentligi