Ózbekstan Respublikası mámleketlik ǵárezsizliginiń 34 jıllıǵı múnásibeti menen orınlarda “Watan ushın, xalıq ushın, millet ushın!” súreni astında mámleketimiz boylap hár qıylı mádeniy-aǵartıwshılıq ilajlar ótkerilmekte.

Bayram múnásibeti menen Nókis qalasındaǵı mayıplıǵı bolǵan hayal-qızlar “Múriwbet” internat úyindegi tárbiyalanıwshılar arasında salamat turmıs tárizin úgit-násiyatlaw, olardıń fizikalıq salamatlıǵın bekkemlew maqsetinde sport jarısları shólkemlestirildi.
Estafeta oyınlarında belsene qatnasqan tárbiyalanıwshılardıń oylap tabıwshılıǵı, jedelligi hám tez háreket etiwi Qaraqalpaqstan Respublikası Bajıxana basqarması xızmetkerleri hám mákeme administraciyası tárepinen ádil bahalanıp barıldı.
Sport jarısları bayram ilajına ulasıp, onda mádeniyat tarawı wákilleri tárepinen ana-watanımızdı jırlawshı qosıqlar atqarıldı.
Ilajda mákeme tárbiyalanıwshıları da belsene qatnasıp, ózleriniń dóretiwshilik qábiletlerin kórsetti. Bajıxana xızmetkerleri tárbiyalanıwshılarǵa bayram qutlıqlawın jollap, sawǵalar tarqattı.
Bunday ilajlar qatnasıwshılardıń salamat hám mazmunlı turmıs keshiriwine xızmet etetuǵının, olardıń jámááttegi doslıq qatnasıqların bekkemleytuǵının atap ótiw kerek.

Qaraqalpaqstan xabar agentligi