Korrupciyaǵa qarsı gúresiw agentliginiń direktorı Akmal Burxonov BMSh Náshebentlik zatlar hám jınayatshılıq boyınsha basqarmasınıń Awǵanstan, Oraylıq Aziya, Iran hám Pakistan boyınsha regionallıq wákili Oliver Stolpe menen ushırastı.

Ushırasıwda BMShtıń Korrupciyaǵa qarsı konvenciyasın ámelge asırıw sheńberinde berilgen usınıslardı ámelge asırıwda erisilgen nátiyjeler hám bar mashqalalar dodalandı.
Usı jılı Dohada bolıp ótetuǵın konvenciyaǵa qatnasıwshı mámleketler konferenciyası aldınan mámleketler arasında kelisilgen qatnaslardı islep shıǵıw imkaniyatların úyreniw, sonıń ishinde, rezolyuciya joybarlarına usınıslardı tayarlaw boyınsha birgeliktegi rejeler kórip shıǵıldı.
A.Burxonov Ózbekstannıń korrupciyaǵa qarsı gúresiw siyasatında xalıqaralıq birge islesiw tiykarǵı baǵdarlardan biri ekeni, bul baǵdarda BMSh strukturaları, atap aytqanda, Náshebentlik zatlar hám jınayatshılıq boyınsha basqarması Ózbekstannıń baslamaların bárqulla qollap-quwatlap kiyatırǵanı ushın minnetdarshılıq bildirdi.
O.Stolpe Ózbekstannıń korrupciyaǵa qarsı siyasatındaǵı áhmiyetli reformalar, atap aytqanda, korrupciyanıń aldın alıwǵa qaratılǵan jańa preventivlik mexanizmlerdi engiziw, tarawda sanlastırıwdı rawajlandırıw baǵdarında alıp barılıp atırǵan háreketlerdi joqarı bahaladı.
Sóylesiw juwmaǵında BMSh wákili Agentlik tárepinen birge islesiwdiń hár qıylı baǵdarları boyınsha alǵa qoyılǵan óz-ara paydalı usınıslardı qollap-quwatlap, olardı keleshekte ámelge asırıwǵa tayar ekenin bildirdi.

ÓzA