“Ózximiyasanaat” akcionerlik jámiyeti hám Koreya xalıqaralıq birge islesiw agentligi (KOICA) arasında gezektegi birge islesiw ámelge asırıldı.

Oǵan tiykarlanıp kúni keshe “Ózbekstanda ximiya texnologiyaları orayınıń potencialın arttırıw” joybarı sheńberinde Koreyada doktorantura basqıshın dawam ettiretuǵın 3 stipendiat penen shártnamalarǵa qol qoyıldı.
Baǵdarlamada qatnasıwshı jas ilimpazlar Koreyanıń University of Science and Technology (UST) joqarı oqıw ornında bilim alıp, keyin ala jańadan shólkemlestirilip atırǵan UzCCTda jumıs alıp baradı. Olar óz bilim hám kónlikpelerin mámleketimiz ximiya sanaatında innovaciyalar hám turaqlı rawajlanıwǵa baǵdarlawı názerde tutılǵan.
Jámiyet málimleme xızmetiniń xabarına bola, 2021-2027-jıllarǵa mólsherlengen bul joybar elimizdiń ximiya sanaatınıń básekige shıdamlılıǵın arttırıw, zamanagóy ilimiy infrastrukturanı jaratıw hám maman qánigeler tayarlawǵa qaratılǵan. Joybar ámelge asırıla baslaǵanınan berli 11 magistrant hám 10 PhD student baǵdarlama qatnasıwshısı sıpatında tańlap alındı.
“Ózximiyasanaat” AJ hám KOICA menen birgelikte ámelge asırılıp atırǵan joybar tek ǵana jas ilimpazlardıń ilimiy potencialın arttırıwda emes, al mámleketimiz ximiya sanaatında innovaciyalıq sheshimlerdi engiziw hám turaqlı rawajlanıwda ayrıqsha áhmiyetke iye.

ÓzA