Búgin Yaponiyanıń mámleketimizdegi Ayrıqsha hám tolıq huqıqlı elshisi Xatori Takashi hám Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipovtıń qatnasıwında kún shıǵıs eli húkimetiniń biyǵárez járdem baǵdarlaması sheńberinde jámi 422 million ien – shama menen 2,8 million dollar qunǵa teń Almasıw notalarına qol qoyıldı.

Bul kelisim “Kadrlar tayarlaw ushın stipendiya usınıw” baǵdarlaması tiykarında mámleketimizdiń mámleketlik uyımlarındaǵı jas xızmetkerleri Yaponiyada bilim alıwın támiyinleydi. Sonday-aq, ministrimiz JISA- Yaponiya xalıqaralıq birge islesiw agentliginiń elimizdegi wákilxanasınıń basshısı Bito Yoshibumi joybar boyınsha Grant shártnamasına qol qoydı.
2026-jıl dawamında jas mámleketlik xızmetkerlerden 18 i yapon universitetlerinde 2 jıllıq magistratura, 1 i 3 jıllıq doktorantura basqıshında bilim alıw imkaniyatına iye boladı. Bunıń nátiyjesinde jas kadrlarımız mámlekettiń rawajlanıwı ushın zárúr qánigelik bilimlerin iyelep, jámiyetimizdiń rawajlanıwına múnásip úles qosıwı kútilmekte. Ulıwma, túrli taraw hám baǵdarlar boyınsha birgelikte ámelge asırılıp atırǵan bunday joybarlar Yaponiya hám Ózbekstan qatnasıqların tereńlestiriw, bar doslıq baylanısların jáne de bekkemlewge xızmet etetuǵını anıq.
Bizge belgili, 2022-jıl dekabr ayında Tokioda “Oraylıq Aziya – Yaponiya” sóylesiwi sheńberinde Sırtqı isler ministrleriniń 9-májilisi bolıp ótken. Sol sóylesiwler dawamında erkin hám ashıq Oraylıq Aziyada turaqlı rawajlanıwǵa erisiw ushın “Insanǵa investiciya kirgiziw” hám “Ósiw sapası”na tiykarlanǵan jańa birge islesiw modelin rawajlandırıwǵa qaratılǵan rejeler alǵa qoyılǵan edi. Bul baǵdarlama usı eki baǵdar sheńberindegi joybarlardıń maqsetin ózinde jámlegen.
Yaponiya húkimeti Ózbekstanda kadrlar tayarlaw hám eki mámleket arasındaǵı óz-ara túsinisiwdi tereńlestiriw boyınsha háreketti turaqlı dawam ettiriw niyetinde.

ÓzA