Ózbekstan Respublikası suw xojalıǵı ministri Shavkat Hamroev Egipet Arab Respublikasınıń mámleketimizdegi Ayrıqsha hám tolıq huqıqlı elshisi Tamir Hammad penen ushırasıw ótkerdi.

Ushırasıwda eki mámleketti birlestirip turatuǵın tariyxıy-mádeniy uqsaslıq, ázeliy doslıq hám tıǵız birge islesiw ayrıqsha atap ótildi.
Óz gezeginde, sóylesiw waqtında Ahmad Farǵoniy miyrası eske alındı. Ol óz dáwiriniń jetik astronomı, matematigi hám geografı sıpatında Baǵdad, Damask hám Kairda ilimiy izleniwler alıp barǵan. Ilimpaz 861-jılı Nil dáryasında suw qáddin ólshew ushın “Miqyos an-Nil” qurılmasın qurǵan bolıp, bul qurılma derlik 1200 jıl dawamında úzliksiz xızmet etken. Búgingi kúnde bolsa ol turistler baratuǵın áhmiyetli tariyxıy estelikke aylanǵan.
Ushırasıwda tárepler suw resurslarınan nátiyjeli paydalanıw, jer astı suwları rezervin úyreniw, suwdı únemlew texnologiyaları hám innovaciyalar tarawında tájiriybe almasıw máselelerin dodaladı.
– Ózbekstanda da, Egipette de diyqanshılıq ekonomikanıń tiykarǵı tarmaqlarınan biri bolıp esaplanadı. Egin jetistiriw ushın bolsa suw eń áhmiyetli faktor. Biz suwdan aqılǵa uǵras paydalanıw hám onı únemlewde úlken tájiriybege iyemiz. Bul baǵdarda birge islesiwge tayarmız, – dedi elshi mırza.
Elshi Tamir Hammad suw xojalıǵı ministrin usı jıldıń 12-16-oktyabr kúnleri Kair qalasında ótkeriletuǵın “Suw hápteligi” ilajlarına da mirát etti. Ol bul sóylesiwdi júdá nátiyjeli hám este qalarlıq ushırasıwlardan biri sıpatında bahaladı.
Ushırasıw juwmaǵında tárepler suw xojalıǵı tarawında óz-ara birge islesiwdi bekkemlewge kelisip aldı.

N.Ziyodullaeva, ÓzA