Ózbekstan hám Qıtay arasındaǵı strategiyalıq sheriklik qatnasıqları izbe-iz rawajlanıp atırǵanı hám eki tárepleme birge islesiw jańa baǵdarlarda bekkemlenip atırǵanı búgingi kúnniń áhmiyetli waqıyası bolıp esaplanadı.

Usı process sheńberinde Qıtaydan kelgen abıraylı delegaciyanıń mámleketimizdiń mámleketlik shólkemlerine saparı da úlken áhmiyetke iye.
Qıtay Elektronika sawda palatasınıń prezidenti Van Ninniń basshılıǵındaǵı delegaciya hám “Ózeltexsanaat” associaciyasınıń juwapkerleri qatnasıwında Sanlı texnologiyalar ministrligi hám “Ózavtosanaat” AJda shólkemlestirilgen ushırasıwlarda bul haqqında sóz boldı.
Delegaciya saparı sheńberinde ótkerilgen eki tárepleme sóylesiwlerde Qıtay kompaniyaları menen birge islesiw baylanısların bekkemlew máseleleri dodalandı. Sonday-aq, avtomobil qurılısı, elektrotexnika hám málimleme texnologiyaları tarawlarında birgeliktegi joybarlardı ámelge asırıw perspektivaları boyınsha pikir alısıldı.
Sóylesiw waqtında birgeliktegi lokalizaciyalaw baǵdarlamaların keńeytiw, zamanagóy texnologiyalar transferi, investiciyalardı tartıw hám qánigeler arasında tájiriybe almasıw boyınsha anıq usınıslar alǵa qoyıldı. Onda ámeliy ilajlardı kóriw maqsetinde jumısshı toparlar dúziw baslaması qollap-quwatlandı.
Birlespe málimleme xızmetiniń xabarına bola, Qıtay delegaciyasınıń elimizdegi ushırasıwları eki mámleket arasındaǵı óz-ara isenim hám paydalı birge islesiwge xızmet etedi. Sóylesiwlerde sanaat, avtomobil qurılısı hám sanlı texnologiyalar tarawlarındaǵı birgeliktegi baslamalar dodalanıp, ámeliy birge islesiwdi jáne de keńeytiwge qaratılǵan anıq baǵdarlar belgilep alındı. Bul bolsa Ózbekstan hám Qıtay arasındaǵı strategiyalıq sheriklik qatnasıqların jańa basqıshqa alıp shıǵatuǵınına gúman joq.

N.Ziyodullaeva,
ÓzA