Ózbekstan Jazıwshılar awqamında Ózbekstan Respublikası Prezidenti Shavkat Mirziyoevtiń 2025-jıl 10-iyuldegi “Ózbekstan Respublikası mámleketlik ǵárezsizliginiń otız tórt jıllıq bayramına tayarlıq kóriw hám onı ótkeriw haqqında”ǵı qararınıń orınlanıwı boyınsha “Watan ushın, millet ushın, xalıq ushın!” bas ideyası tiykarında “Watan ushın jasayıq” tańlawınıń jeńimpazların sıylıqlaw máresimi bolıp ótti.

Jazıwshılar awqamı baslıǵınıń dóretiwshilik máseleler boyınsha birinshi orınbasarı, belgili shayır Minhojiddin Mirzo elimizde dóretiwshilerdi hár tárepleme qollap-quwatlaw, xoshametlew máselesi tiykarǵı orın iyelep atırǵanın atap ótti.
Komissiya aǵzaları tańlawǵa kelip túsken jámi 71 avtordıń 192 shıǵarmasın kórip shıqtı. Ózbek hám qaraqalpaq tillerinde basıp shıǵarılǵan kitaplar, baspasózde járiyalanǵan materiallar janrlıq klassifikaciyası boyınsha saylap alındı.
“Watan ushın, millet ushın, xalıq ushın!” degen bas ideyanı ózinde jámlegen bul tańlaw procesinde jańa turmıs, jańa jámiyet qurıw jolındaǵı tabıslar, xalqımızdıń pidákerlik miyneti, aqıl-parasatı hám dóretiwshilik potencialı, ullı ata-babalarımızdıń miyrasın úyreniw hám keńnen úgit-násiyatlaw, xalqımızdıń azatlıǵı ushın gúresip, bul jolda janın pidá etken, eziwshi dúzim dáwirinde siyasiy repressiya qurbanı bolǵan ata-babalarımızdıń ibratlı turmısı sáwlelendirilgen shıǵarmalarǵa ayrıqsha itibar qaratıldı.
Tańlaw juwmaǵına bola, birinshi orınǵa Qozoqboy Ywldoshev ǵárezsizlik dáwiri ózbek ádebiyatınıń kórkemlik-estetikalıq tallawına baǵıshlanǵan “Kwrkam swz yoǵdusi” ádebiy maqalalar toplamı ushın múnásip dep tabıldı.
Ekinshi orınǵa Baxtiyar Genjamuratov “Báhár tasqını” (“Abırjı”) qosıqlar toplamı ushın hám Shodiqul Hamro “Muazzam” hám “Kwk kwl” atlı prozalıq kitapları ushın múnásip dep tabıldı.
Úshinshi orın Farmon Toshevqa “Mahmudxwja Behbudiy” draması ushın, Munavvara Usmonovaǵa “Bir kúni” atlı prozalıq hám “Kiprikdagi tun” qosıq toplamları ushın, Zikrilla Nematqa ǵárezsizlik jıllarında mártlershe qaytıs bolǵan 206 millet pidayılarına baǵıshlanǵan “Yovqur wǵlonlar yodi” qosıq toplamı ushın, Dilorom Ismoilovaǵa “Vatanni jonimdek asragin” hám “Yaxshiyam, sen borsan” qosıq toplamları ushın berildi.
Sonday-aq, Twlqin Eshbek “Jadidlar javhari” hám “Ayol va oy” toplamları ushın, Mirzabek Davron “Kwnglimda bir qulf ywq” qosıqlar kitabı ushın, Muhammad Siddiq “Musofir daraxt” qosıqlar toplamı ushın, Shuhrat Aziz baspasózde járiyalanǵan qosıq hám publicistikalıq shıǵarmaları ushın, Raxshona Ahmedova “Tongotar” romanı ushın, Muhammadali Ǵafforov áskerler arasında watansúyiwshilik hám kitapqumarlıq mádeniyatın arttırıwǵa baǵıshlanǵan dúrkin maqalaları ushın xoshametlewshi sıylıqqa múnásip dep tabıldı.
-Dóretiwshi bárqulla itibarǵa mútáj, – dedi belgili ádebiyattanıwshı ilimpaz, filologiya ilimleriniń doktorı Qozoqboy Ywldoshev. – Shıǵarmalarımız qaysıdur orınlarǵa múnásip kórilgeni bul úlken itibar degeni. Olardı oqıytuǵın adamlar kóbeyse, jáne de quwanıshlı bolamız. Dóretiwshige bolǵan itibar jaqsı shıǵarmalardıń júzege keliwine túrtki boladı. “Kwrkam swz yoǵdusi” atlı kitapta ádebiyatqa baylanıslı áhmiyetli máseleler, dóretiwshilerdiń ádebiy portreti sáwlelendirilgen.
Ilaj sheńberinde Ózbekstan Jazıwshılar awqamınıń aǵzalıǵına qabıl etilgen bir topar dóretiwshilerge aǵzalıq gúwalıqları hám kitaplar tapsırıldı.
Jeńimpazlarǵa Jazıwshılar awqamınıń diplom hám estelik sawǵaları tapsırıldı.

ÓzA