Aymaqlardı sociallıq-ekonomikalıq rawajlandırıw, xalıq ushın qolaylı hám zamanagóy sharayatlar jaratıw mámleketlik siyasattıń tiykarǵı baǵdarlarınan biri bolıp esaplanadı. Keyingi jılları bul baǵdarda jańa qatnaslar engizilip, olardıń unamlı nátiyjeleri bir qatar aymaqlarda kózge taslanbaqta. Áne, sonday ámeliy tájiriybelerden biri – “Zarbdor” tájiriybesi bolıp esaplanadı.

Usı tájiriybe tiykarında házirgi waqıtta Beruniy rayonında da anıq hám maqsetli jumıslar jolǵa qoyılǵan. Jámi 5,7 mlrd sumlıq 2 joybardı ámelge asırıw rejelestirilgen bolıp, olar arqalı rayon infrastrukturasın sapa jaǵınan jańa basqıshqa alıp shıǵıw názerde tutılmaqta, – dep maǵlıwmat beredi rayon hákimligi Málimleme xızmeti bólimi.
Usı sheńberdegi iri baslamalardan biri – “Ámir Temur” mákan puqaralar jıyını aymaǵında jaylasqan “Faroǵon” hám “Quruvchilar” kósheleriniń bir bólegin 24 saat isleytuǵın, yaǵnıy 24/7 jumıs rejimindegi kewil ashar kóshege aylandırıw bolıp esaplanadı. Bul joybardıń ulıwma bahası 4,3 mlrd sumdı quraydı.
Sonday-aq, “Shabbaz diyqan bazarı”n Shabbaz awıl puqaralar jıyını aymaǵında qurılıp atırǵan jańa diyqan bazarına kóshiriw boyınsha da ámeliy jumıslar alıp barılmaqta. 1,4 milliard sumlıq bul joybar sheńberinde bazar ishindegi infrastrukturanı jaqsılaw jumısları jedel pátlerde dawam etpekte.
Bunday joybarlar tek ǵana aymaqtıń kelbetin hám infrastrukturasın jaqsılap qoymastan, al xalıqtıń turmıs dárejesine de unamlı tásir kórsetedi.

Qaraqalpaqstan xabar agentligi