Elimizde hayal-qızlardı sociallıq qorǵaw, bántligin támiyinlew hám turmıs sharayatın jaqsılaw maqsetinde keń kólemli ilajlar ámelge asırılmaqta. Tórtkúl rayonı hákimliginde “Hayal-qızlar dápteri”ne juwapker shólkemlerdiń basshıları qatnasıwında gezektegi ámeliy májilis bolıp ótti. Onda Ózbekstan kásiplik awqamları Federaciyasınıń Qaraqalpaqstan Respublikası boyınsha baslıǵı U.Jalmenov qatnastı, – dep maǵlıwmat beredi rayon hákimligi Málimleme xızmeti bólimi.

Májiliste usı jıldıń 6-basqıshı sheńberinde “Hayal-qızlar dápteri”ne kirgizilgen hayal-qızlarǵa kórsetiletuǵın járdemlerdi óz waqtında hám nátiyjeli jetkerip beriw máseleleri dodalandı. Bul processte hár bir hayal-qızdıń talabına qarap individual qatnas jasaw hám mánzilli járdemdi shólkemlestiriwdiń áhmiyeti ayrıqsha atap ótildi.
U.Jalmenov juwapker basshılarǵa bul baǵdardaǵı jumıstı bunnan bılay da jetilistiriw boyınsha zárúr túsinikler berip, hár bir ilajdı anıq reje tiykarında ámelge asırıw boyınsha anıq wazıypalardı belgilep berdi.
Májilis juwmaqları, álbette, keleshekte ámelge asırılatuǵın jumıslar ushın bekkem tiykar bolıp xızmet etedi. “Hayal-qızlar dápteri” arqalı hayal-qızlardı qollap-quwatlaw sistemasın bunnan bılay da jetilistiriw – sociallıq turaqlılıq hám shańaraq abadanlıǵına xızmet etetuǵın áhmiyetli qádemlerden biri.

Qaraqalpaqstan xabar agentligi