«Watan ushın, millet ushın, xalıq ushın!»

Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen Ózbekstan Respublikası mámleketlik ǵárezsizliginiń 34 jıllıǵı múnásibeti menen Nókis qalası “Doslıq” kanalı boyında “Jaslar baǵı” maydanında “Watan ushın, millet ushın, xalıq ushın!” súreni astında úlken mádeniy ilaj bolıp ótti.

 Ilajǵa Qaraqalpaqstan Respublikası Joqarǵı Keńesiniń Komitet baslıǵı M.Atamuratov, Qaraqalpaqstan Respublikası Ministrler Keńesiniń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha sekretariat baslıǵı B.Kalimbetov, Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva qatnastı.

Onda “Turan mektep teatrı” hám “Iqtidor mektep ansambli” tańlawlarınıń rayon (qala)lıq, aymaqlıq hám Respublikalıq basqıshlarında jeńimpaz bolǵan mektep jámáátleri ózleriniń eń saylandı kórkem shıǵıwları menen qatnastı.

Talantlı  oqıwshılardıń qosıqları, saxnalıq kórinisleri hám teatrlastırılǵan kompoziciyalar bayram ilajı qatnasıwshılarına  úlken zawıq hám kóterińki keypiyat baǵıshladı. Sonday-aq, bayram ilajında milliy kiyimler, buyımlar hám súwretler kórgizbesi de  shólkemlestirildi.

Qaraqalpaqstan xabar agentligi