Ózbekstan Respublikası ǵárezsizliginiń 34 jıllıǵı aldınan respublikamızda qurılıs, abadanlastırıw jumısları keń kólemde alıp barılmaqta. Ásirese, avtomobil jolların jańadan qurıw hám qayta ońlaw jumısları jedellik penen alıp barılıp, bayram aldınan xalqımızǵa qolaylı sharayatlar jaratılmaqta.

Ózbekstan Respublikası Prezidentiniń 2025-jıl 14-avgustta qabıl etilgen “Qaraqalpaqstan Respublikasın sociallıq-ekonomikalıq rawajlandırıwǵa qaratılǵan ilajlardı bunnan bılay da jedellestiriw haqqında”ǵı qararına muwapıq, Nókis qalasınan Taxtakópir rayonına alıp baratuǵın D234 “Nókis-Shımbay-Taxtakópir” avtomobil jolınıń 59 kilometrlik bólegin ońlaw ushın 15 milliard sum qarjı ajıratılǵan edi.
Usı qarardıń orınlanıwı sheńberinde qurılıs-ońlaw jumısları baslandı. Atap aytqanda, joldıń 17-18 kilometrine asfalt tósew jumısları basqıshpa-basqısh alıp barılmaqta.
Ońlaw jumısları Nókis rayonı Avtomobil jollarınan paydalanıw mámleketlik shólkemi tárepinen shólkemlestirilip, oǵan 6 zamanagóy arnawlı texnika hám 13 jumısshı tartılǵan.
Bul qurılıs jumısları tek ǵana transport infrastrukturasın jaqsılap qoymastan, xalıqtıń kúndelikli turmısın ańsatlastırılıp, aymaqlararalıq baylanıslardı bekkemlep, ekonomikalıq nátiyjelilikti arttırıwa xızmet eteri sózsiz.

Qaraqalpaqstan xabar agentligi