Taqıyatas rayonı Naymankól APJ aymaǵındaǵı fermer xojalıqlarınıń ǵawasha maydanlarında defoliaciya ilajların sistemalı ámelge asırıw boyınsha kórgizbeli seminar bolıp ótti.

Onda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, Ósimlikler karantini hám qorǵaw agentliginiń baslıǵı R.Sherbaev, rayon hákimi K.Aytbaev, tiyisli taraw juwapkerleri hám diyqan-fermerler qatnastı.
Seminarda defoliaciya ilajlarınıń agrotexnikalıq áhmiyeti, onı sapalı hám óz waqtında orınlawdıń ónimdarlıqqa tásiri, sonday-aq, zamanagóy usıllar hám ximiyalıq qurallardan paydalanıw boyınsha tolıq túsinikler berildi.
Qánigeler tárepinen atız basında ámeliy kórsetpeler berilip, fermer xojalıqlarına nátiyjeli defoliantlardıń túrleri, olardı qollanıw muǵdarları hám qáwipsizlik qaǵıydaları haqqında maǵlıwmatlar berildi.
Sonday-aq, seminarda zúráátti óz waqtında jıynap-terip alıw, paxtanıń sapasın saqlaw hám kelesi jılǵı zúráát ushın egin egiletuǵın egislik maydanlardı tayarlaw máselelerine de ayrıqsha dıqqat qaratıldı.
Ilajda qatnasıwshılar ózlerin qızıqtırǵan sorawlarǵa juwap aldı hám aldıńǵı tájiriybeler boyınsha pikir alıstı.
Usınday kórgizbeli seminar Qońırat rayonındaǵı Ádebiyat APJ aymaǵında jaylasqan fermer xojalıqları atız maydanlarında da bolıp ótti.

Á.Jiyemuratov,
Qaraqalpaqstan xabar agentligi