Pekin qalasındaǵı Qıtay Milliy muzeyinde “Jarqın civilizaciyalar juldızları: ShBSh mámleketleri milliy muzeyleriniń mádeniy miyrası” atamasındaǵı kórgizbe jumıs basladı.

Usı jılı 31-avgust-1-sentyabr kúnleri Tyanczin qalasında bolıp ótetuǵın Shanxay birge islesiw shólkemi sammiti múnásibeti menen shólkemlestirilgen bul ánjumanda Ózbekstan, Qıtay, Belarus, Iran, Qazaqstan, Qırǵızstan, Pakistan, Rossiya, Tájikstan mámleketlerinen milliy hám tariyxıy muzeylerdiń wákilleri qatnaspaqta.
“Shanxay ruwxı” principi – “civilizaciyalardıń hár túrliligine húrmet hám birgelikte rawajlanıwǵa umtılıw” súreni astında ótip atırǵan ekspoziciya ushın bul ret aǵza mámleketlerdiń 10 muzeyi hám mádeniy mákemesinen 220 siyrek ushırasatuǵın eksponat tańlap alınǵan. Atap aytqanda, hár bir mámlekettiń civilizaciyası tariyxı, rawajlanıwı hám evolyuciyasın sáwlelendiretuǵın, sonday-aq, úlkeler arasındaǵı tariyxıy baylanıslardı kórsetetuǵın áhmiyetli artefaktler bar. Bul siyrek ushırasatuǵın zatlar civilizaciyalar galaktikası juldızları sıyaqlı ShBSh mámleketleriniń bay mádeniy tiykarın ayqın kórsetedi.
Itibarlı tárepi, kórgizbede Ózbekstan tariyxı mámleketlik muzeyi hám mámleketlik kórkem óner muzeyi fondlarınan 27 eksponat usınılǵan. Hár bir shıǵarmada elimizdiń mádeniy miyrası hám baylıǵı – eń áyyemgi civilizaciyalardan baslap, XIX-XX ásir kórkem ónerine shekemgi úlgiler jámlengen.
Qıtay Milliy muzeyi dúnyanıń en iri muzeylerinen biri bolıp esaplanadı. Pekin orayındaǵı Tyananmen maydanınıń shıǵısında jaylasqan bul arxitekturalıq estelik 2003-jılı revolyuciya hám tariyx muzeyleriniń birlesiwi nátiyjesinde shólkemlestirilgen. Muzey kollekciyası bes mıń jıldan aslam tariyxtı qamtıp alǵan – neolit dáwiri tabılmalarınan ótken ásir kórkem óner dóretpelerine shekem. Komplekste bronza buyımlar, farfor, kalligrafiya, súwretshilik buyımları, budda músinleri, hújjetler hám Qıtaydıń jańa tariyxına baylanıslı buyımlar kórsetiledi.

Behruz Xudoyberdiev, Wtkir Alimov, ÓzA
Pekin, Qıtay