Ózbekstan hám Qıtay arasında óz-ara ámeliy birge islesiw keyingi jıllarda barǵan sayın keńeyip, bekkem institucionallıq tiykarlarǵa iye bolıp barmaqta. Atap aytqanda, 2025-jıldıń 6 ayı dawamında Ózbekstan hám Qıtay arasındaǵı sawda aylanısı 7,7 milliard AQSh dollarınan arttı. Bul bolsa 2024-jıldıń usı dáwirine salıstırǵanda 17 procentke óskeninen dárek beredi.

Bajıxana komitetinde Qıtay Xalıq Respublikasınıń Elektronika sawda palatasınıń prezidenti Vang Ning basshılıǵındaǵı delegaciya menen ushırasıw bolıp ótti. Komitet baslıǵınıń orınbasarı N.Musaxammedov miymanlardı elimizge saparı menen qutlıqlap, tiykarǵı másele sıpatında “bajıxana aymaǵında qayta islew” – bajıxana rejimi astında elektronika ónimlerin qayta islew hám eksport etiw perspektivaları dodalandı, delinedi Bajıxana komitetiniń maǵlıwmatında.
Isbilermenlerdiń jumısın qollap-quwatlaw basqarmasınıń baslıǵı I.Pardaev “Elektronika tarawında abıraylı brend hám básekige shıdamlı ónimlerdi islep shıǵarıwda bajıxana aymaǵında qayta islew rejiminen paydalanıw tártipleri” atamasında prezentaciya ótkerdi. Onda usı rejimde islew talapları hám abzallıqları tolıq kórsetip ótildi.
Ushırasıw juwmaǵında tárepler óz-ara birge islesiwdi jáne de jedellestiriw hám dodalanǵan joybarlardı tez waqıt ishinde ámelge asırıw boyınsha zárúr ilajlar kóriwge kelisip aldı.

A.RUSTAMOV, ÓzAnıń xabarshısı