Mámleketimizde awıl xojalıǵı hám azıq-awqat qáwipsizligi tarawlarında birge islesiwdi keńeytiw, fitosanitariya hám karantin baǵdarlarında sırt mámleketler menen tájiriybe almasıw, sharwashılıq, veterinariya hám sanlastırıw baǵdarında birgeliktegi joybarlardı ámelge asırıw boyınsha nátiyjeli jumıslar islenbekte.

Sonıń ishinde, búgin Ózbekstan Respublikası awıl xojalıǵı ministri Ibrohim Abdurahmonov Iordaniya awıl xojalıǵı ministri Sayeb Abdel Haleem Hresat penen ushırastı. Onda dáslep, Iordaniyanıń belgili “Avası” qoy násilin mámleketimizge alıp keliw hám onı jergilikli klimat sharayatına beyimlestiriw máselesi kórip shıǵıldı. Sonday-aq, elimizde túrli sharwa malların jetistiriw hám olardı Iordaniyaǵa eksport etiw perspektivaları belgilendi.
Ushırasıwda óz-ara sawda baylanısların keńeytiw máseleleri de dodalandı. Sonıń ishinde, Ózbekstannan chereshnya, kishmish hám basqa da ónimlerdi Iordaniyaǵa eksport etiw, ol jerden bolsa qurma, zaytun hám zaytun mayın elimizge alıp keliw imkaniyatları belgilep alındı. Bunnan tısqarı, qurǵaqshılıqqa shıdamlı sortlardı lokalizaciyalaw da birge islesiwdiń perspektivalı baǵdarlarınan biri sıpatında atap ótildi.
Awıl xojalıǵı hám azıq-awqat qáwipsizligi tarawlarında birge islesiwdi keńeytiw maqsetinde fitosanitariya hám karantin baǵdarlarında tájiriybe almasıw, sonday-aq, sharwashılıq, veterinariya hám sanlastırıw boyınsha birgeliktegi joybarlardı ámelge asırıw boyınsha kelisimlerge erisildi.
Tárepler bir qatar pilot joybarlardı ámelge asırıw, aldın qol qoyılǵan memorandumlarda belgilengen wazıypalardı óz waqtında orınlaw hám bul boyınsha juwapker shaxslardı tayınlaw boyınsha da kelisip aldı, delinedi Awıl xojalıǵı ministrliginiń maǵlıwmatında.
Bul ushırasıw eki mámleket arasında agrar tarawda birge islesiwdiń jańa basqıshın baslap beretuǵını, óz-ara paydalı baslamalardı turmısqa engiziwde áhmiyetli qádem bolatuǵını atap ótildi.

A.RUSTAMOV, ÓzA