31-avgust-1-sentyabr kúnleri Tyanczin qalasında ShBSh sammiti bolıp ótedi. Bul ánjuman struktura jumıs baslaǵanınan berli eń iri ilaj boladı, dedi Qıtaydıń Rossiyadaǵı elshisi CHjan Xanxuey “RIA Novosti” agentligine bergen intervyuinde.

– Májiliste 20 dan aslam mámleket jetekshisi, sonday-aq, 10 xalıqaralıq shólkemniń basshısı qatnasadı, – dedi diplomat. – Bul, álbette, aǵza mámleketlerdiń birge islesiwdi jáne de tereńlestiriw jolındaǵı umtılısı birdey ekeninen dárek beredi. Ulıwma, ShBSh xalıqaralıq jámiyetshiliktiń itibarın barǵan sayın kúshli ózine tartpaqta.
Málim etiliwinshe, aǵza mámleketlerdiń basshıları bul ret sawda, ilimiy-texnikalıq innovaciya, qáwipsizlik hám ShBSh Rawajlanıw bankin shólkemlestiriw máselelerin dodalaydı.
Málimlemede sammit hár qıylı finanslıq qollap-quwatlaw mexanizmlerin shólkemlestiriwge járdemlesetuǵını, sonday-aq, sawda, investiciya, energetika, óz-ara baylanıslılıq, sanlı ekonomika hám jasıl texnologiya tarawlarında sheriklikti bekkemlew máseleleri de kóteriletuǵını atap ótilgen.
RF jetekshisiniń járdemshisi Yuriy Ushakovtıń aytıwınsha, bul hápte Vladimir Putin Qıtayǵa tórt kúnlik sapar menen baradı hám Shanxay birge islesiw shólkemi sammitinde de qatnasadı.
2001-jılı dúzilgen xalıqaralıq shólkem – ShBSh quramında házirgi waqıtta Hindstan, Iran, Qazaqstan, Qıtay, Qırǵızstan, Rossiya, Tájikstan, Pakistan hám Ózbekstan bar. 2024-jıl iyul ayında Belarus ta tolıq huqıqlı aǵzaǵa aylandı. Awǵanstan hám Mongoliya baqlawshı, Ázerbayjan, Armeniya, Kambodja, Nepal, BAÁ, Túrkiya, Shri-Lanka bolsa birge islesiwshi mámleket statusına iye.

S.Rahimov, ÓzA