“Puqaralıq baslaması” milliy sıylıǵı tańlawın ótkeriw boyınsha senatorlar, deputatlar, bir qatar ministrlikler hám uyımlardıń wákillerinen ibarat shólkemlestiriw komitetiniń dáslepki májilisi ótkerildi.

Senat Baslıǵınıń birinshi orınbasarı Sodiq Safoev basqarǵan májiliste “Puqaralıq baslaması” milliy sıylıǵı Prezidentimizdiń 2024-jıl 26-avgusttaǵı “Puqaralıq jámiyeti institutların mámleket tárepinen qollap-quwatlaw sistemasın bunnan bılay da jetilistiriw ilajları haqqında”ǵı pármanı tiykarında shólkemlestirilgeni atap ótildi.
Tańlaw mámleketimizde erkin puqaralıq jámiyetin qáliplestiriw hám rawajlandırıwǵa múnásip úles qosqan puqaralıq jámiyeti institutları, belsendi jámiyetshilik wákilleri hám intaker puqaralardı xoshametlew maqsetinde hár eki jılda ótkeriledi.
Bul tańlaw usı jılı birinshi márte shólkemlestirilmekte. Tańlawda “Insan huqıqları menen erkinlikleriniń nátiyjeli qorǵawshısı”, “Jaslar siyasatı tarawındaǵı intaker jetekshi”, “Máhállelerdegi jámiyetlik strukturalardıń belsendisi”, “Eń belsendi jámiyetlik qadaǵalawshı”, “Ekologiya hám qorshaǵan ortalıqtı qorǵaw, abadanlastırıw hám kóklemzarlastırıw boyınsha belsendi hám intaker”, “Sociallıq innovaciyalar hám rawajlanıw boyınsha eń belsendi hám intaker”, “Inklyuziv jámiyet qurıw boyınsha eń belsendi hám intaker”, “Mecenatlıq jumısı boyınsha eń belsendi hám intaker” nominaciyaları boyınsha jeńimpazlar anıqlanadı.
Jeńimpazlar shólkemlestiriw komitetiniń juwmaǵı hám keń jámiyetshiliktiń pikiri tiykarında anıqlanadı hám nominaciyalar boyınsha birinshi orın BEMniń 50 esesi, ekinshi orın BEMniń 40 esesi, úshinshi orın BEMniń 30 esesi muǵdarında aqshalay sıylıq, arnawlı statuetka hám sertifikat penen sıylıqlanadı.
Tańlawda qatnasıw ushın 2025-jıldıń 1-oktyabrine shekem Oliy Majlis janındaǵı Puqaralıq jámiyeti institutların qollap-quwatlaw jámiyetlik fondı hám onıń aymaqlıq bólimlerine sońǵı eki jılda jumıs alıp barıp atırǵan puqaralıq jámiyeti institutları, belsendi jámiyetshilik wákilleri hám intaker puqaralar jeke maǵlıwmatları, jumısı, erisken jetiskenliklerin sáwlelendiretuǵın hújjetler menen birge arza tapsırıwı múmkin.
Májilis juwmaǵında tańlaw haqqında keń jámiyetshilikti xabardar etiw, jeńimpazlardı ashıq-aydın sistema arqalı anıqlaw hám tańlawdı ótkeriwge baylanıslı basqa da shólkemlestiriw máseleleri boyınsha kelisip alındı.

N.Abduraimova, ÓzA