Aldın xabar berilgenindey, suw xojalıǵı tarawı xızmetkerleri ushın qosımsha dáramat deregin jaratıw maqsetinde járdemshi xojalıqlardı shólkemlestiriw baǵdarındaǵı jumıslar dawam etpekte. Melioraciya xızmetkerleri kollektorda úyrek baǵıwdı jolǵa qoydı,-dep xabar bermekte Suw xojalıǵı ministrliginiń baspasóz xızmeti.

Atap aytqanda, Ózbekstan Respublikası Suw xojalıǵı ministrligi tárepinen berilgen tapsırmalardı orınlaw hám jumısshı xızmetkerlerdi qosımsha xoshametlewdi sistemalı shólkemlestiriw maqsetinde Xojeli rayonında melioraciya bólimi tárepinen «Jańajap» aymaǵındaǵı kollektorda úyrekshilik xojalıǵı shólkemlestirildi.
Qaraqalpaqstan Respublikası Suw xojalıǵı ministrligi janındaǵı Meliorativlik ekspediciyasınıń juwapkerleri hám Bas shep jaǵalıq sisteması xızmetkerleriniń qatnasıwında aymaqlarda járdemshi xojalıqlardı shólkemlestiriw máselesi boyınsha kórgizbeli seminar ótkerildi.
Ilajda ǵárezsizlik bayramında xızmetkerlerge gósh hám basqa da awıl xojalıǵı ónimlerin tarqatıw boyınsha da tapsırmalar berildi.
Seminar qatnasıwshıları ijara shártnaması tiykarında xalıqqa ajıratılıp, úyrek baǵıw jolǵa qoyılǵan Samankól APJ aymaǵındaǵı kollektordı da barıp kórdi. Juwapkerler tárepinen bul baǵdardaǵı jumıslardı jedellestiriw boyınsha kórsetpeler berildi.

Qaraqalpaqstan xabar agentligi