Ǵárezsizlik perzentleri

Kelesheginen úmit kúttiretuǵın sportshı jaslardıń biri Sultanbek Perdebaetıń sportqa qızıǵıwshılıǵı balalaǵınan baslandı. Nókis rayonı sport mektebinde stol tennisi boyınsha trener bolıp isleytuǵın qońsısı Kudaybergen Ayapbergenovtıń qızıqtırıwı menen ol baslawısh klassta oqıp júrgen gezlerin baslap sport mektepke qatnay baslaydı. Baladaǵı qábilet, shaqqanlıqtı ańǵarǵan treneri onıń menen ayrıqsha shuǵıllanıp, nátiyjede ol stol tennisi boyınsha ótkerilgen jarıslarǵa qatnasıp tabıslarǵa erisip baslıydı. Rayonlıq basqıshta jaqsı nátiyjelerge erisken ol Qaraqalpaqstan hám Ózbekstan kóleminde ótkerilgen chempionatlarda da qatnasıp, múnásip orınlardı iyeleydi. Atap aytqanda 2018-jılı 16-22-sentyabr kúnleri Tashkent wálayatında stol tennisi boyınsha 2006-jılı tuwılǵan hám onnan kishi bolǵan jas óspirimler hám qızlar arasında bolıp ótken Ózbekstan chempionatında úshinshi, 2018-jıl 9-15- avgustta Samarqand qalasında ótkerilgen Ózbekstan chempionatında úshinshi, 2022-jılı 18-24-aprel kúnleri Buxara wálayatında 2008-2008-jılları hám onnan kishi bolǵan jas óspirimler hám qızlar arasında bolıp ótken Ózbekstan chempionatında birinshi orınlardıń jeńimpazı bolıwǵa erisedi.
Jaqında 11-15-avgust kúnleri Sırdárya wálayatında bolıp ótken «Bes baslama olimpiadası»nıń Ózbekstan Respublikası basqıshında sporttıń stol tennisi boyınsha «A» liga baǵdarında 16-21 jas kategoriyasında bolıp ótken jarısta Sultanbek úshinshi orındı iyelep, diplom hám bahalı sawǵa menen sıylıqlandı. Quwanıshlısı ol usı jeńisi menen ózi jasaytuǵın Tóktaw APJ ǵa WORKOUT sport maydanshasın qurıp beriliwin jeńip aldı.
-Sultanbektiń sportqa qatnasqan dáslepki kúnleri ele yadımda. Minez qulqı tınıq, hár bir aytqan sózdi buljıtpay orınlaytuǵın bala bul sport túrine qızıǵıp, kóp kúttirmey jaqsı nátiyjelerdi qolǵa kirgizdi. Mine, endi tabısları menen máhállemiz turǵınların da quwantpaqta, -deydi onıń birinshi treneri Q.Ayapbergenov.
Sonday-aq usı jerde onı jarısqa tayarlaǵan trenerlerinen Qaraqalpaqstan Respublikası saylandı komandasınıń járdemshi treneri Janibek Dosmurzaev , aǵa trener Baxtiyar Xamgeldiev hám Ayzada Baxievalardıń da miynetlerin ayrıqsha aytıp ótiw orınlı.
Shańaraq perzent tárbiyasında tiykarǵı orındı iyeleytuǵın muxaddes orın. Perzentleriniń tárbiyasına ayrıqsha qarap, olardıń oqıp bilim alıwı hám sport túrleri menen shuǵıllanıwı menen birge paydalı miynet penen bánt bolıwın qadaǵalawǵa alǵan atası Perdebay ata menen ata-anası Sultanbektiń tabısı arqalı máhállesine sport maydanshası qurılatuǵınlıǵınan júdá quwanıshlı.
-Perzentlerimizdiń bul tabısları Prezidentimiz tárepinen elimizde sporttı rawajlandırıwǵa qaratılıp atırǵan itibarı dep bilemiz. Sebebi, mámleketimizde jaslardıń sport penen shuǵıllanıwı ushın barlıq sharayatlar jaratılǵan. Bul ushın biz ata-analar Jurtbasshımızdan minnetdarmız. Ustaz trenerlerine raxmet aytamız, -deydi onıń ákesi Mámbetkárim Atamuratov.
Stol tennisi ǵalabalıq sport túri bolıp, sońǵı waqıtlarda bul sport penen shuǵıllanıwshılardıń sanı artıp barmaqta. Bul sport penen shuǵıllanǵan adamda, birinshi gezekte, kóriw qábileti jaqsılanadı. Uzaqtı kóre almaytuǵın, kompyuter aldında kóp otıratuǵın yamasa kózin qanday da bir kesellikten emlegen adamlarǵa stol tennisi úlken járdem beredi. Sebebi, oyın waqtında insannıń barlıq itibarı tek topta bolǵanı ushın, kóz qısqa aralıq átirapında shınıǵadı. Sol sebepli stol tennisi menen turaqlı shuǵıllanıwshılar arasında kóz shıpakerine múrájat etetuǵinlar derlik ushıraspaydı eken. Stol tennisi dem alıw hám júrek-qan tamır sistemalarınıń jumısına da unamlı tásir kórsetedi. Oyın waqtında bir neshe quramalı soqqı beriledi. Bir minutta 120 ǵa shekem soqqı beriliwi sebepli, stol tennisi insandı shaqqanlıqqa hám epshillikke úyretedi.
Sportta tabısları menen shańaraǵın, ustazların hám máhálleleslerin quwantıp, aydın keleshekke úlken isenim menen qádem taslap atırǵan Sultanbek Perdebaev aldına úlken maqsetler qoyǵan. Olda bolsa elimizge xızmet etip, ata-anasına múnásip perzent bolıw. Bul jolda oǵan áwmet yar bolıwın tileymiz.

G.Turdıshova, Qaraqalpaqstan xabar agentligi