Keyingi jılları mámleketimizde azıq-awqat qáwipsizligin támiyinlew, ishki bazardı jergilikli ónimler menen tolıqtırıw hám awıl xojalıǵınıń áhmietli tarmaqlarınan biri – qusshılıqtı rawajlandırıwǵa ayrıqsha itibar qaratılmaqta.

Bul baǵdarda jeke isbilermenlerdiń belsendiligi artıp, innovaciyalıq kózqaraslar tiykarında iri óndirislik joybarlar ámelge asırılmaqta. Bul baǵdardaǵı nátiyjeli jumıs úlgisi sıpatında “Eko Agro Kapital” JShJdı ayrıqsha atap ótiw múmkin.
Kárxana 2016-jıldan berli qusshılıq baǵdarında jumıs alıp barıp, Germaniya texnologiyası tiykarında máek beriwshi “Sendi korall” násilli tawıqlardı baǵıw menen shuǵıllanadı. Házirgi kúnde 52 mıń bas tawıq saqlanbaqta hám kúnlik máek islep shıǵarıw kólemi 42 mıń danadan asadı. Ónimler tiykarınan Qaraqalpaqstan hám Xorezmniń ishki bazarlarına jetkerip beriledi, – dep maǵlıwmat beredi Beruniy rayonı hákimligi Málimleme xızmeti bólimi.
Kárxana óz talapları ushın qus azıqlıǵın jetistirip, ishki qayta islew cexında azıqlıq tayarlaydı. “Sendi korall” porodalı tawıqlar 120 kúnlikten baslap máyek qoya baslaydı. Bıyıl Ukraina texnologiyası tiykarında 72 mıń bas shójelerge mólsherlengen jańa bokslar tolıq úskenelengen.
Kárxananıń jumıs basqarıwshısı Suxrob Rahimovtıń atap ótiwinshe, 2025-jıldıń aqırına shekem 400 kilovatt quwatlılıqqa iye quyash panellerin ornatıw rejelestirilgen. Sonday-aq, isbilermen mámleket tárepinen ajıratılıp atırǵan subsidiyalardan belsene paydalanıp kelmekte.
Bunday joybarlar ishki bazardı turaqlı támiyinlew, jumıs orınların jaratıw hám jergilikli ónim islep shıǵarıwdı keńeytiwde úlken áhmiyetke iye.

Qaraqalpaqstan xabar agentligi