Jınayat isleri boyınsha Tórtkúl rayonı sudınıń tergew sudyası B.Saburov tárepinen rayondaǵı “Ullıbaǵ” máhállesinde kóshpeli sud májilisi ótkerildi.

Bul retki sud májilisi ádettegi sud imaratında emes, al xalıq arasında – máhállede shólkemlestirildi. Maqset – huqıqbuzarlıq islegen puqaralardı jazalaw menen birge, qalǵanlarǵa sabaq bolıwı, nızamǵa bolǵan húrmetti jáne de bekkemlew.
Májilis dawamında Hákimshilik juwapkershilik haqqındaǵı kodekstiń 131, 183, 185 hám 202-statyalarında názerde tutılǵan huqıqbuzarlıqlardı islegen 5 shaxsqa juwapkershilik máselesi kórip shıǵıldı. Sudya islerdi tereń talqılap, hár bir huqıqbuzarǵa islegen qılmısına jarasa 5 sutkadan 15 sutkaǵa shekem hákimshilik qamaq jazasın tayınladı.
Usı kóshpeli sud májilisine gúwa bolǵan máhálle xalqı da óz kózi menen kórip, nızam buzılsa, jaza sózsiz ekenligin ańlap jetti. Olardıń aytıwınsha, bunday sud májilisleri jámiyette tártip-intizamdı támiyinlewde úlken áhmiyetke iye.
– Nızam hámmemiz ushın birdey. Eger hár birimiz óz minnetimiz hám juwapkershiligimizdi bilsek, shańaraqta da, máhállede de, pútkil jámiyette de tınıshlıq boladı,-deydi máhálle belsendileri.
Atap ótilgenindey, bunday kóshpeli sud májilisleriniń tiykarǵı maqseti – huqıqbuzarlardı jazalawdan góre, olarda nızamlarǵa húrmet sezimin oyatıw, keleshekte bunday jaǵdaylar qaytalanbawına erisiw bolıp tabıladı.
Solay eken, hár bir puqara huqıq hám minnetlerin ańlap, nızamlarǵa ámel etse, turmısımız jáne de abat, tınısh boladı.

Qaraqalpaqstan xabar agentligi