Ózbekstan mámleketlik denetárbiyası hám sport universiteti Nókis filialı tárepinen Sport ministrligi hám Mektepke shekemgi hám mektep bilimlendiriwi ministrligi menen birgelikte Ózbekstan Respublikası ǵárezsizliginiń 34 jıllıǵı múnásibeti menen «Áhmiyetli 90 kún» joybarı sheńberinde 22-23-avgust kúnleri sporttıń stol tennisi, voleybol hám kóp gúres túrinen sport jarısları ótkerildi.

Onıń ashılıw máresiminde Qaraqalpaqstan Respublikası Sport ministri E.Qutıbaev, bir qatar taraw basshıları, professor-oqıtıwshılar hám ustaz trenerler shıǵıp sóylep, jarıstıń áhmiyetine toqtap ótip, qatnasıwshı komanda aǵzalarına áwmetler tiledi.
Maqset – usı jıl 15-may kúni Ózbekstan Respublikası Prezidentiniń basshılıǵında mektep bilimlendiriwi sistemasındaǵı reformalardıń nátiyjeliligin arttırıw boyınsha ótkerilgen videoselektor májilisinde jaslardıń bos waqıtların mazmunlı ótkeriwge qaratılǵan «Áhmiyetli 90 kún» baǵdarlaması hám «Salamat turmıs tárizin keńnen en jaydırıw hám ǵalabalıq sporttı jáne de rawajlandırıw ilajları haqqında»ǵı pármanınıń orınlanıwın támiyinlew, ǵalabalıq sport túrlerin keńnen en jaydırıw, jaslardıń bos waqıtların mazmunlı ótkeriw bolıp esaplanadı.
Jarısqa Qaraqalpaqstan Respublikasınıń barlıq qala hám rayonlarınan kelgen dene tárbiyası muǵallimleri hám mektep oqıwshılarınan dúzilgen komandalar qatnastı.
Ilajdıń ekinshi kúni jarıs qatnasıwshıları ushın Xojeli rayonı aymaǵında jaylasqan Mizdaxqan arxeologiyalıq kompleksine sayaxat shólkemlestirildi, yarım final hám final basqıshları bolıp ótti.
Sayaxat barısında qatnasıwshılar bul arxeologiyalıq kompleks haqqında keń túrde túsinikke iye boldı hám ózleri ushın estelik súwretlerine túsip, pikir alısıp, kewilli dem aldı.
Filialda jeńimpazlardı sıylıqlaw máresimi bolıp ótip, jeńimpaz sportshılarǵa shólkemlestiriwshiler tárepinen tayarlanǵan arnawlı diplom, kubok, medal hám estelik sawǵaları tapsırıldı. Sıylıqlaw máresimi kórkem óner sheberleriniń koncert baǵdarlaması menen dawam etti.

Á.Jiyemuratov,
Qaraqalpaqstan xabar agentligi