Gúzgi-qısqı máwsimde tutınıwshılarǵa bir tegis tábiyǵıy hám suyılttırılǵan gaz jetkerip beriwde dus keletuǵın mashqalalardıń aldın alıwda gaz tarmaqların texnikalıq tekseriwden ótkeriw áhmiyetli sanaladı.

Házirgi waqıtta hár bir jaqtı kúnnen nátiyjeli paydalanǵan taraw qánigeleri orınlarda gaz tarmaqlarına iri ońlaw, qurılıs-rekonstrukciyalaw jumısları menen birge, mashqalalı aymaqlardaǵı gaz támiynatı menen baylanıslı múrájatlardı úyrenip, olardı saplastırıw jumıslarına itibar qaratpaqta.
Sonday-aq, taraw qánigeleri tárepinen tutınıwshılardı úzliksiz tábiyǵıy gaz benen támiyinlew boyınsha belgilep alınǵan reje tiykarında keń kólemli ilajlar ámelge asırılmaqta. Olarǵa jetkerip berilip atırǵan gazdiń sapasın jaqsılaw, tábiyǵıy gazden qáwipsiz paydalanıw, gaz tarmaqlarınıń jaramlılıǵın anıqlaw hám gazdiń tesip shıǵıw jaǵdayların saplastırıw boyınsha arnawlı mobil laboratoriya járdeminde qala hám rayonlarda jıl basınan 4297,7 kilometrlik gaz tarmaqları kózden ótkerildi. Sonnan 124,2 kilometrlik gaz tarmaqları jer astında, al 3052,5 kilometrlik gaz tarmaqları jer ústinde jaylasqan.
Tekseriwlerler dawamında 272 jaǵdayda gaz tarmaqlarınan gazdiń tesip shıǵıw jaǵdayları anıqlanıp, taraw qánigeleri tárepinen óz waqtında saplastırıldı. Nátiyjede 152 mıń metr kub gazdiń únemleniwine erisildi. Bul baǵdardaǵı jumıslar orınlarda dawam ettirilmekte.
Álbette, bul alıp barılıp atırǵan jumıslar negizinde aldımızdaǵı gúzgi-qısqı máwsim dáwirinde tutınıwshılardıń janılǵı energetikasına bolǵan talabın qanaatlandırıw, tábiyǵıy gazden unemli hám qáwipsiz paydalanıw bolıp tabıladı. Bul baǵdardaǵı jumıslar respublikamızdıń basqa da qala hám rayonlarında qızǵın dawam etpekte.

Á.Jiyemuratov,
Qaraqalpaqstan xabar agentligi.