Ózbekstan Respublikası Ministrler Kabinetiniń 2025-jıl 13-avgusttaǵı “2025-jıl 22-23-avgust kúnleri “Abat hám payızlı máhálle – elimiz kórki!” súreni astında ulıwmaxalıqlıq qayırqomlıq shembiligin ótkeriw haqqında”ǵı pármanı hám Qaraqalpaqstan Respublikası Ministrler Keńesiniń 2025-jıl 15-avgust kúngi arnawlı biyligine tiykarlanıp respublikamız máhállelerinde, kóp qabatlı turaq jaylar, háwliler átirapında, gúzarlar, qıyabanlar, zıyarat etiw orınları, qoyımshılıqlar, kóshe hám jollardı abadanlastırıw jáne balalar maydanshaların tártipke keltiriw boyınsha shembilik shólkemlestirildi.

Ózinde eń iygilikli maqsetlerdi jámlegen qayırqomlıq shembiliginde jámi 486 628 adam qatnastı hám olardan 170 319 ı jaslardan ibarat.
Eki kún dawam etken qayırqomlıq shembiliginde 2402 gektar maydan abadanlastırılıp, 1885 tonna turmıslıq hám qurılıs shıǵındıları shıǵarıp taslandı.
Bul ilajlarǵa 379 texnika quralları tartılıp, usı texnikalardıń járdeminde 960 kilometrlik jap-salma hám lotoklar tazalandı. 232 544 terekke tárbiya berildi. 13027 kóshe, 461 qoyımshılıq hám 8 zıyarat orınları abadanlastırıldı. Sonday-aq, 438 balalar hám sport maydanshaları tártipke keltirildi hám ońlandı.
“Abat hám payızlı máhálle – elimiz kórki!” súreni astındaǵı qayırqomlıq shembiligi sheńberinde xalıqtıń sociallıq qorǵawǵa mútáj qatlamına da bir qatar miyrim-shápáát járdemleri kórsetildi. Atap aytqanda, 923 turaq jay ońlap berilip, 22850 shańaraqtıń qıytaq jerleri shúdigarlanıp, tártipke keltirildi.
Sonıń menen birge, 1812 járdemge mútáj shańaraqqa materiallıq járdemler kórsetildi. Sonnan mayıp hám jalǵız baslı kekseler 326 dı quraydı.

Qaraqalpaqstan xabar agentligi.
A.Dabılovtıń túsirgen súwretleri