Miynetkesh diyqanlarımız tárepinen 2026-jılǵı zúráát ushın gúzgi biyday egiw jumıslarına qızǵın tayarlıqlar kórilip, rayonlarda bul jumıslar qızǵın baslanıp ketti.

Beruniy hám Ellikqala rayonlarında awıl xojalıǵı tarawınıń basshıları, klasterler hám fermerlerdiń qatnasıwında usı máselelerge baǵıshlanǵan kórgizbeli seminar ótkerildi.
Beruniy rayonındaǵı Nawayı hám Ellikqala rayonındaǵı Gúldirsin awıl puqaralar jıyınlarında jaylasqan “Eldor Yuldoshboy” hám “Gúldirsin parvozi” fermer xojalıqlarında ótkerilgen seminarda 2026-jıldıń zúrááti ushın biyday egiw jumısların shólkemlestiriw hám paxta maydanlarında defoliaciya jumısların sistemalı shólkemlestiriw boyınsha máseleler dodalandı.
Bul áhmiyetli ilajda Qaraqalpaqstan Respublikası Ministrler Keńesi Baslıǵınıń Awıl hám suw xojalıǵı máseleleri boyınsha orınbasarı Sh.Teshaev, rayon hákimleri hám taraw juwapkerleri qatnastı.
Seminar dawamında biyday egiw hám paxta defoliaciyası boyınsha aldıńǵı tájiriybeler kórsetilip, taraw qánigeleri óz-ara pikir alıstı.
Ilajdıń eń tolqınlandırıwshı bólegi – tuqım sebiw máresimi boldı. Qatnasıwshılar birgelikte jerge tuqım sewip, 2026-jıldıń zúrááti ushın bereket tiledi.
Álbette, bunday máresimler keleshekke úmit penen qaraw, miynetkesh diyqanlarımızdıń pidákerlik miynetin qádirlew hám tábiyat penen úylesimli jasawǵa umtılıwdıń nıshanı esaplanadı.
2026-jıldıń zúrááti ushın biyday egiw jumısları basqa rayonlarda da dawam etpekte.

Á.Jiyemuratov,
Qaraqalpaqstan xabar agentligi