Sırt eller menen doslıq baylanıslar, birge islesiwler basqa tarawlar sıyaqlı medicina tarawında da sońǵı waqıtlarda jaqsı jolǵa qoyılǵan. Medicinada ózine tán rawajlanıwları menen jetekshi orınǵa iye bolǵan Yaponiya mámleketiniń Juntendo universiteti professor-oqıtıwshıları hám studentlerinen ibarat delegaciya búgin 22-avgust kúni Qaraqalpaqstan medicina institutına keldi.

Institut basshıları hám miymanlar arasında ótkerilgen ushırasıwda eki tárepleme birge islesiwdiń jańa perspektivaları dodalandı. Atap aytqanda, klinikalıq immunologiya hám manual terapiya boyınsha ilimiy tájiriybe almasıw; farmaciya tarawında joybarlardı jolǵa qoyıw, aldınǵı yapon medicinalıq texnologiyaların engiziw sonday-aq, xızmetkerler hám studentler almasıwı baǵdarlamaların rawajlandırıw máseleleri kórip shıǵıldı.
Ushırasıw dawamında Aralboyı aymaǵında densawlıqtı saqlaw menen baylanıslı áhmiyetli mashqalalar hám olardı sheshiw jolında ámelge asırılıp atırǵan keń kólemli reformalar haqqında maǵlıwmat berildi. Miymanlar instituttıń bilimlendiriw procesi, zamanagóy sharayatları hám jas kadrlardı tayarlawdaǵı jetiskenlikleri menen de jaqınnan tanıstı.
Bul ushırasıw Qaraqalpaqstan medicina institutınıń xalıqaralıq kólemde ashıq-aydınlıǵı, innovaciyalıq medicinalıq bilimlerdi engiziw hám jas qánigelerdi tayarlawdaǵı háreketlerine jáne de kúsh baǵıshlaydı.
Delegaciya qatnasıwındaǵı ilajlar dawam etpekte.

Qaraqalpaqstan xabar agentligi