Xalıqtıń mashqalaların ornında úyreniw hám sheshiw maqsetinde orınlarda shólkemlestirilip atırǵan kóshpeli qabıllawlar puqaralardıń mámleketlik uyımlarǵa bolǵan isenimin bekkemlewde úlken áhmiyetke iye bolmaqta.

Usı maqsette, Ámiwdárya rayonı prokurorı B.Masharipov tárepinen puqaralardıń múrájatları boyınsha gezektegi qabıllaw shólkemlestirildi. Qabıllaw procesi Máhálleler awqamı rayonlıq bóliminiń imaratında ótkerilip, onda tiyisli bólim hám shólkemlerdiń juwapker shaxsları hám puqaralar qatnastı.
Ilaj dawamında puqaralar tárepinen túrli baǵdarlardaǵı mashqalalar, usınıs hám múrájatlar bildirildi. Sonıń ishinde, máhállege balalar maydanshasın qurıw, kadastr hújjetlerin rásmiylestiriw, kópir qurıw, materiallıq járdem alıw, isbilermenlik ushın jer ajıratıwda ámeliy járdem kórsetiw sıyaqlı máseleler kóterildi, – dep maǵlıwmat berdi rayon hákimliginiń Málimleme xızmeti bólimi.
Múrájatlar úyrenilip, ayırımlarına ornında sheshim tabıldı. Qalǵanların tiyisli shólkemler menen birgelikte sheshiw boyınsha anıq tapsırmalar berildi.
Sonı ayrıqsha atap ótiw kerek, bunday ushırasıwlar xalıqtıń huqıqları menen máplerin támiyinlew, puqaralardı qıynap atırǵan áhmiyetli máselelerge sheshim tabıwda nátiyjeli qural esaplanadı.

Qaraqalpaqstan xabar agentligi